Nongpoh: Ban nangpynskhem halor ka jingdawa ban wanrah ia ka C&RD Block ha Mawhati Constituency, hynnin ka sngi Saitjan ki nongialam ka Synjuk ki Rangbah Shnong Mawhati Area ha ryngkat ki nongialam ka FKJGP Mawhati Circle, ki la pynlong ia ka jingialang kaba kyrpang ha Mawhati bad kata ka long ban dawa jur na ka sorkar, ba ka dei ban wanrah beit ia ka C&RD Block ha Mawhati.
Ha katei ka jingialang kaba la donlang da u Bah Marius Jyrwa, President ka Synjuk ki Rangbah Shnong Mawhati Area, u Bah Edmund Marten, Spoke person katei ka Synjuk, nangta u Samla Shanlang Diengdoh, President ka FKJGP Mawhati lem bad shibun ki rangbah shnong na katei ka thain Mawhati, ha kaba lyngba katei ka jingialang, ki la shim ia ka rai ban dawa jur na ka Sorkar ba ka dei ban wanrah noh ia ka C&RD Block ha Mawhati, khnang ba kan pynsuk ia ki paidbah bad ki nongialam shnong jong katei ka thain.
Haba kren sha ki nongthohkhubor, ki nongialam ka Synjuk ki Rangbah shnong, ha ryngkat ki nongialam ka FKJGP, ki la dawa jur na ka sorkar ba ka dei ban wanrah noh ia ka C&RD Block ha Mawhati, ha kaba ka nongrim kaba la pynlong ia ki ban dawa jur na ka sorkar, ka dei hadien ba ki la iohi bad lap ba ki don shibun ki shnong hapoh katei ka thain, ki la shem jingeh shisha ban beh shaduh Umsning Block, na ka bynta ban leit wad ia ki kam pynroi ha ki shnong ki thaw bad katno tam na bynta ki kam barit baria.
Haba batai halor ka jingeh kaba la iakynduh da ki nongialam shnong, u Bah Edmund Marten, u la ong ruh ba kumba ka long mynta, ki don ki nongialam jong katei ka thain ki la shem jingeh shisha ban beh shaduh Umsing Block, namar ka dei ka jaka kaba la jngai bad kaba la ktah eh ia ka jinglut jingsep ki rangbah shnong, namar ki don ki rangbah shnong kiba hap ban pynlut ka pisa haduh T. 5 hajar tam ha ka shisngi, kata tang ban beh ia iwei ki kam barit hapoh ka Umsning C&RD Block.
Namarkata, na ka jingiakren hapdeng ki nongialam ka Synjuk ki Rangbah shnong lem bad ki dkhot ka FKJGP, ki la shim ia ka rai ban dawa na ka sorkar ba ka dei ban wanrah beit ia ka C&RD Block ha Mawhati Constituency, kata da kaba kin leit kynduh bad phah dorkhas sha u Symbud Myntri Rangbah bad Myntri ka C&RD Block hapoh ka sorkar jylla, na ka bynta ban pynurlong ia katei ka jingdawa, ka ban wanrah jingmyntoi ia ki paidbah.
Phi don ban ong eiei?