Jur ka dheng kali, ba pyntreikam da ka FASTag ha Toll Plaza Pahammawlein 20mer

Nongpoh: Ka jingthmu ka National Highway Authority of India (NHAI) ban pyntreikam da ki FASTag ha baroh ki Toll Gate, na ka bynta ban weng ia ka dheng kali ha ki Toll Gate ne ki jaka khrong khajna, ka la wanrah jingeh ia ki paidbah nongleit nongwan kiba pyndonkam ia ka surokbah NH-6 ha Ri Bhoi.

Lah ruh ban kdew hangne, ba ka NHAI ka la rai ban pyntreikam noh da ki sticker FASTag, ka long kum shibynta ban pynsuk ia ki paidbah nongleit nongwan, khnang ba kin lait na ka jingieng lain lane ban siew lyngba ka pisa nokot sha kitei ki Toll Plaza bad ia katei ka rai ban pyntreikam noh da ki FASTag, na ka liang ka NHAI ka la rai ban sdang pyntreikam noh naduh ka 31 tarik u Nohprah.
Ka jingtip kaba la iohlum da u Nongthoh khubor, la ong ba ka nongrim kaba la pynlong ia katei ka jingsahkut kali, ka dei namar ba bun na ki kali kiba iaid ba ieng lyngba katei ka Toll Plaza, ki dei ki kali ki bym pat don ia ki FASTag ha ki kali jong ki, ha kaba na ka liang ki nongpyniaid ha katei ka Toll Plaza, ki la shim khajna arshah na kaba dei ban siew, kata na bynta jong kito ki kali ki bym pat don ia ka FASTag.
Shuh shuh la ioh jingtip ruh, ba katei ka jingsahkut kali ha katei ka Toll Plaza, ka la neh mynta la la jan shitaiew lynter, ba katei ka jing dheng kali ka la jia beit man ka sngi bad kaba la wanrah jingeh shikatdei eh ia ki paidbah nongleit nongwan bad khamtam eh na bynta jong kito kiba don ia ki kam kiba kyrkieh.
Haba ioh ban iakren bad ki katto katne ngut ki nongniah kali, ki la ong ba kumba ka long mynta ka don ka jingdkoh ha ka rukom pyntreikam ia kitei ki FASTag, namar ki don ki khep ba thut ha kito ki tiar kiba la buh ban ot ia ka khajna na ka fast tag sticker ha ki kali (Detector Device), namar ki don ki khep ba kim treikam tikna bad ki paidbah ki hap ban siew da ka pisa, hynrei haba ki la iaid shakhmat na katei ka Toll Plaza, ki sa ioh pat ia ka Message ba ka pisa jong ki, ka la shah ot na ki account kaba ki la pyniasnoh bad katei ka FASTag.
Na kaei kaba la iohi na ka jingsahkut kali ha Toll Plaza Pahammawlein 20mer, la iohi ba ka la pynsyrtok shikatdei eh ia ki paidbah nongleit nongwan bad khamtam eh na bynta jong kito kiba don ia ki kam kiba kyrkieh, ha kaba la mih ruh ka sur na ki nongniah kali ba ka NHAI ka la dei ban nangpynjynsur ha ka rukom pyntreikam ia kitei ki FASTag, namar kumba ka long mynta ki ka pynshem jingeh palat ia ki nongleit nongwan.