Shillong: Ha ka kyrwoh khubor kaba la pyllait paidbah da uwei u samla uba la tip kyrteng kum u Melajied Khongbuh na ka shnong Nongtyngur, u la ong ba ka ka la don ka jingjulor ia ka rep ka riang jong ki nongshong shnong ka Raid Lyngkhat namar ka jingjubor palat ka khaïi masi tuh sha Bangladesh lyngba katei ka thaiñ. Utei u samla ha ka kyrwoh khubor u la ong ba ki dieng kwai ki khyllem lut, ki kwah sara ki shah ïuh lut, ki bri tympew kiba dei jong ki nongshong shnong ka Lapalang, Nongtyngur, Rimassar, Rimai, Nongkyndah, Nongeitniang, Mawlynnong ter ter ki la julor lut bad katei ka la pynkynduh jingeh ia ki nongrep, ha kaba ki jaka rep sohtrun ruh la ong ba ki la julor lut.
La pyni ia ka bynta jong ka Bri, kaba la kylla shrah bad ba la dap paw sa ka khyndew suda, na ka jingiaid ki masi.
Nalor ka jingjulor ka rep ka riang, utei u samla u la ong ba ki Masi kiba da ki phew trok kiba iaid na katei ka thaiñ ki la pynjulor ruh ia ki lynti iaid jong ki briew kiba la shna da ki longshuwa da ki maw tah. Utei u samla u la ong ba nalor kitei ki jingeh ba ki briew ki ia kynduh ha katei ka thaiñ, kawei pat kaba ima ka dei ka jingkynrei palat ki khynnah kiba pep skul noh tang shiteng por naba ki la bang ban leit bylla masi naba la siew ha ka dor kaba heh. Nalor ka jingpep skul shiteng por u la ong ba ka mih sa ki kam sniew ha kaba kitei ki khynnah ki ngop ha ka dih kyiad bad na ka dih kyiad ka mih sa ka kren sih kren sang bad ka hiar noh ka akor ka burom jong ki.
Sa kawei pat ka jingeh kaba u samla Khongbuh u la kdew ka dei ka jingwan poi shong shnogn ki bar jylla ha ka thaiñ Lyngkhat. U la ong ba kitei ki wan ha ka dur jong ki nongbylla hynrei mynta ki la wan ialam ia ki khun ki kti ki kur ki jait jong ki bad ki la sdang ban thaw shnong bad mynta ki la don kumba katto katne snem bad ki la sngew trai shnong. U la ong ba ki trai bri ki la sdang ban kyndang ia ki hynrei ki sheptieng kylla naba ki la sdang bun paid bad ba ki pyni bor.
U la ong ba kitei ki bar jylla ki la ri jingri ruh bad ki la pyllait lan ia ki jingri jong ki bad kitei ki jingri jong ki ki leit ban pynjulor ia ka rep ka riang jong ki trai shnong bad mynta ka la mih sa kawei pat ka jingsyier ia ki paidbah bad ka buh jingtieng ia ki kynthei ki khynnah ban iaid lynti ruh naba ki la shah pyndik na ka por sha ka por bad don ruh ki khep ba ki kynthei ki shu lait na ka jingshah batbor, ong katei ka kyrwoh khubor. Utei u samla u la kyntu ia ki Sengbhalang ba kin phai khmat sha katei ka thaiñ ban iada ia ka bri u Hynniewtrep.
Hadien ba la ioh ia katei ka jingthoh u Rupang u la ioh ruh ban ia kren lyngba ka telephone bad u Sordar ka Raid Lyngkhat u Babu Kri Tangsong, ban tohkit na u ia kitei ki jingkynnoh. U Sordar u la ong ba mynshuwa ka don ka jingpynhiar masi kaba bun, hynrei hadien ba u la pynmih ia ka hukum ba la khang pyrshah, mynta ym don shuh kat kaba u tip ma u, hynrei ioh ka don hangne hangtai wei ar ia kata u la ong ba um da tip bha.
Halor ka jingkynnoh ba la don ki bar jylla kiba dei ki nongbylla kiba la thaw shnong, u Sordar u la ong ba um don jingtip eiei ia kata hynrei u iathuh ba ka don tang ha kawei ka jaka bad kata ka dei ha Bor Hill hynrei ia katei u la ong ba la dep ban ia kren pynbeit bad ki trai Bri ba ki briew kiba sah hangtei kin shong tang katkum ka jingdonkam jong ki trai naba ki dei ki nongrep kba bad ki dei ki ba ap Chowkidar ia ki Bri hynrei haba la dep ka kam ki dei ban mih noh na katei ka jaka. U sordar u la ong ba lada don ki trai bri ne mano mano ba ioh jingtip ia ka jingthaw shnong ki bar jylla ki dei ban ujor ia u naba lada ym don nongujor un ym ioh jingtip.