Julor ka iing ba lynshop ka eriong ha shnong Puridua

Nongpoh:Ki la don artylli ki iing ha Ri Bhoi, kata kawei hapoh ka shnong Puridua bad kawei pat hapoh ka shnong Niangbarithem, ki la julor hi khait na ka jingshah lynshop ha ka Eriong kaba la khie kynsan myn shi sngi janmiet bad kaba la syllad naphang ha kiba bun ki bynta hapoh ka Distrik.

Kitei ki artylli ki iing kiba la shah lynshop ha ka eriong, ki la julor hi khait bad kaba la wanrah ruh ia ka jingduhnong kaba khraw ia ki trai jong kitei ki iing, namar ka eriong ka la rat naphang haduh ba kitei ki iing ki la julor.

Haba iadei bad katei ka jingshah pynjulor ia kitei ki iing, u MLA ka Nongpoh u Bah Mayral Born Syiem ha ryngkat ki nongkitkam ka Nongpoh Block Congress Committee (NBCC), ki la leit ban jurip bad noh synniang ruh da ki Tin sopiing lem bad kiwei ki tiar donkam hapoh kitei ki iing.