Julor 4 ki Auto, 2 tylli ki dukan ba kylla ka trok ha 18mer

Shillong: Saw tylli ki Auto Rickshaw lem bad ar-tylli ki dukan kiba harud surok ha shnong Umdoh 18mer, ki la julor jur, hadien ba ki la shah ban ha kawei ka trok kaba la kylla hynnin ka miet ha ka por 10 baje ei ei mynmiet hapoh katei ka shnong.

Katei ka trok kaba don ia u number NL-01-AE-5591, ka don ha ka lynti ban hiar sha Guwahati, hynrei haba ka la poi ha katei ka jaka, kaba dei ka jaka ba kham long khongdong, katei ka trok ka la jam na shilliang sha shilliang ka surok bad kaba la leit kylla beit hapoh ar-tylli kitei ki dukan harud surok bad kaba la pynjulor ruh ia 4 tylli ki Auto Rickshaw.

Wat la ha katei ka jingjia kylla kali, la iohi ba ka la shisha kaba ishyrkhei, hynrei donbok ba ha katei ka jingjia, kam shym la don kano kano ka jingjia ba sngewsih ne mynsaw briew, laitnoh tang u nongniah bad nongbud jong katei ka trok, kiba la mynsaw malu mala.