Shillong: Ki longkmie Khasi kiba die jingdie madan ha Khyndailad ki la ujor ba uwei u bar jylla uba dei u khar suh juti ha Khyndailad ha ka jaka kaba don marpyrshah ia ka Delhi Mistan u la leh kynshleiñ bad jrong kti ia ki, utei u bar jylla u la kren ruh da ki ktien khlem akor ia kitei ki longkmie kiba die jingdie ha katei ka jaka, la iathuh ba katei ka kam dei satia ka jingjia kaba tang mynta hynrei kaba la jia manla ka sngi haduh ba kitei ki longkmie kim lah shah shuh bad myn hynnin ka sngi ki la pyntip sha ki sengbhalang bad ki la ujor ruh sha ki pulit ka Sadar PS.
U khar suh juti uba la jrongkti bad leh kynshleiñ ia ki longkmie Khasi kiba shong die jingdie ha Khyndailad.
Ki dkhot ka HYC mynta ka sngi ki la leit kem ia utei u khar suh juti uba la tip kyrteng kum u Radhe Shyam Ram ha ka por 2:30 baje nohphai sngi. Utei u khar suh juti u shong dukan marjan bad ki longkmie Khasi kiba die kwai bad kiba die ia ki tiar tynrai. Ia utei u bar jylla ki dkhot ka HYC ki la aiti sha ki pulit ka Sadar bad kumjuh na ka liang kitei ki longkmie ki la ujot da ka FIR ryngkat ka jingdawa ba ki pulit ki dei ban pynshitom ia u katkum ki kyndon jong ka aiñ. Iwei na kitei ki longkmei I dei iba shong basah ha Nongthliew bad iwei pat dei iba shong basah ha Mawlai Mawtawar.