Jop suk u Thombor kum u CEM, Lakhon kum u Chairman

Jowai: U ma Thombor Shiwat u la jop suk ia ka shuki CEM mynta ka sngi khlem don mano mano ba ialeh pyrshah.

U ma Thombor Shiwat, MDC na Nartiang uba la jop kum u kyrtong ka NPP u dei uba la ju long teng ruh kum u CEM ha kine ki san snem ba la dep.

Haba kren hadien ka jingshah jied jong u kum u nongialam ka Executive Committee kaba thymmai, u ma Thombor u la kyntu ia ki para MDC baroh ban ai ka jingiatreilang bad u na ka bynta ban wanrah ia ka roi ka par ha ka District khlem da niew shilliang ia kano kano ka constituencies.

“Phi baroh ki dkhot kane ka iing dorbar, phi ruh phi long CEM haman la ka Constituency jong phi bad sngewbha ai ka jingiatreilang bad nga ban lah ban trei khambha na ka bynta ban kyntiew ia ki kam jong ka District Council ban shakri khambha ia ki paidbah”, la ong u ma Thombor Shiwat.

Haba kren pat sha ki lad pathai khubor ha kamra treikam jong u, u la pynpaw ia ka jingangnud jong u ban wad ia ki lad ki lynti ban pynduh ia ka jinghiran pisa hapoh ka District bad ruh ban wad ki lad ki lynti ban pyndep ia ka Iawmusiang nalor kiwei kiwei.

“Kaba nyngkong eh, ngan pyrshang ban wad ki lad ki lynti ban pynduh ia ka jingkyrduh pisa hapoh ka Council namar wat tang ban siew tulop sha ki nongtrei ruh ka la long ka jingeh ia ka Council”, la ong utei u CEM ba thymmai ka JHADC.

Shwa ban pynlong ia ka election jied CEM, ha ka por 11:00 am la pynlong shwa ia ka Election ban jied ia u Lamphang ka Council ha kaba ia ka dorbar la pyniaid da u Deputy Commissioner ka Jaintia Hills, u ma Garod LNS Dykes.

Na ka bynta katei ka kam ruh, ym don ba ialeh pyrshah bad u ma Lakhon Biam u la jop suk. U ma Lakhon Biam u dei uba la jop na Nangbah Constituency bad kane ka la long hadien ka jingshahrem ha kane ka Election Assembly 2018. U dei ruh u Engineer bad ju trei kum u SDO ka tnad PWD (NEC) ha Khliehriat bad namar ba u la rai ban mih madan sha ka lympung sain hima sima u la iehnoh ia katei ka kam.

Na ka liang ki dkhot ka Iing Dorbar ki la pynpaw ia ka jingiaroh halor ka jingjop u ma Lakhon kum u Chairman ka Council bad ki la kyntu ruh ia u ba un nym leh shilliang khmat iano iano ruh hynrei u dei ban ailad ia ki ban kren hapoh ka iing dorbar halor ka jingeh jong ki paidbah.