Jop suk U bah Pynshngain ia ka shuki CEM KHADC rWeng kyrteng U bah Metbah shuwa ka dorbar

Shillong, 15 Jymmang:
U bah Pynshngain N Syiem u nongialam ka People’ s Democratic Forum ( PDF) u la jop suk ha ka elekshon jied Chief Executive Member ka KHADC ha ka dorbar kyrpang kaba la long mynta ka sngi. U bah Syiem u la jop suk ia katei ka elekshon hadien ba u kyrtong ka ARPA u bah Metbah Lyngdoh u la weng kyrteng noh ialade shuwa ka dorbar. Ia katei ka jingweng kyrteng u bah Metbah la pynbna da ka Chairperson ka KHADC ka kong Teilinia Thangkhiew hapoh ing dorbar, bad la aiti noh ha u bah P.N Syiem ban shimti ia ka kam kum u CEM ba thymmai ka KHADC.
Lah ban kdew ba u bah Metbah Lyngdoh u la weng kyrteng noh ialade hadien ba ka ARPa ka la sngewthuh ba kan ym ioh shuh ia ka ingbun paid ha katei ka ing dorbar kaba don 30 ngut ki MDC. Ka ARPA ka la duh noh ia u bah James Sylliang bad ka kong Grace Mary Kharpuri ki MDC kiba dang leit pyniasoh shen na katei ka kynhun hadien ba la phet noh na ka PDF hynrei sa shisien biang ki la leit ban pyniasoh sha ka PDF. Da ka jingleit iasoh ka kong Grace bad u bah James ka PDF ka la biang pura ki nombar ban bat ia ka bor synshar ha KHADC ha kaba ka la don 16 ngut ki MDC katba ka ARPA pat ka sah mynta sa tang 14 ngut ki MDC .
Hadien ba la wai ka dorbar haba kren sha ki nongthohkhubor , la kylli na ubah P. N syiem haduh katno u sngew skhem ba ka shuki jong u kan neh haduh ba kut ka samoi treikam bad haduh katno u sngew thikna ba ki ar ngut ki MDC kiba mih thapniang kin don ha syndah jong u, u bah Pynshngain u la ong ba ka kong Grace ka la treikam hapoh ka jingialam jong u la lai snem shiteng bad ka tip bha, u dei u nongialam ba kumno.
Utei u CEM ba thymmai ka KHADC u la ong ba haduh mynta um pat shym la bhah kam EM ia ki MDC bad shen un sa ia pynbeit bad phah ia ka kyrteng jong ki sha u Lat ban mynjur, hynrei ia ka kam Dy. CEM pat u la ong yn bat da u bah Process T Sawkmie, u MDC ka Mawlai. “U dei u briew uba la aiti ia ka kam CEM ha nga, khlem pep ka kam Dy. CEM kan leit sha u” ong u bah Pynshngain N Syiem.
Lah ruh ban kdew ba hadien ba u bah Pynshngain u la shimti ia ka shuki CEM, ka Chairperson ka KHADC ka la ailad ia baroh ki MDC ba kin pynpaw ia ka jingkren ai khublei jong ki ia u CEM ba thymmai. Hadien ba la dep lut barohla ailad pat sa ia u CEM ba thymmai aiu u don ban kren na ka liang jong u. Haba kren ha katei ka dorbar u bah P. N Syiem u la pynpaw ia kiba bunbah ki jingangnud jong u ban treikam na bynta ka bha ka miat ka District council bad u la kdew ruh shibun ki kam ba u la leh kum u CEM barim ka KHADC kum ka jinglah ban pynlong ia ka Monolith Festival, ka jingthaw ia ka Village Administration Bill, bad kiwei.