|
Shillong: Ka Shillong Lajong FC ka la pynliem salit ia ka Churchill Brothers ha ka jingiakhun ha la iing mynta ka sngi ha ka lumpung Hero I-League 2018-19 da 3-2 kol ha ka jingiakhun kaba long ha madan JN Stadium ha Shillong. Ia ka Lajong la thep ar kol da u Samuel Kynshi ha ka 36 minit bad kawei ha ka 45 minit da ka penalty bad kawei la thep da u Mahesh Naorem Singh ha ka 83 minit. Katba ia ka Churchill Brothers la thep da u W Plaza ha ka 53 minit bad sa kawei da u A Wolfe ha ka 71 minit. U coach ka Lajong u bah Alison Kharsyntiew u la bujli lai ngut ki nongialehkai ha kane ka jingiakhun mynta ka sngi kiba kynthup ia u Kynsailang Khonsit, Samuel Lalmuanpuia bad u Lalawmpuia Hnamte da kiwei kiba kynthup ia u Novin Gurung, Rakesh Pradhan bad Naorem Mahesh Singh. Ka jingialehkai ka la shongshit bha namar ba ka Lajong ka la ialehkai bha naduh bas dang bad ka la ioh bun ki lad hynrei ka la pynlehnoh ei bun ki kabu. Ka kol kaba ar ia ka Lajong lyngba ka penalty ka la wan hadien ba u nongialehkai ka Lajong u Phrangki Buam u la shah khynniat ha u Wayne Vaz hapoh ka iing kol ka Chirchill bad u referee u la ai da ka penalty ia ka Lajong ha kaba u Samuel Kynshi u la kynjat khlem pynleh noh ei. Hynrei katba nang iaid ka jingialehkai jong ka kyllamiet, ka Churchill ka la lehkai bha bad ka la lah ban pynbiang jingkhein hynrei dei ha ka 83 minit ba ka Lajong ka la ioh ia ka lad ban pynkhih jar biang ban knieh nam tam syndon bad khur syndon 3 point ha kane ka jingialehkai. Kane ka dei ka jingjop kaba ar sien ia ka Lajong ha la iing, ha kaba ka la jop nyngkong ia ka Aizawl. Mynta ka Shillong Lajong kan pynkhreh ban iakhun ia ka East Bengal ha ka 14 tarik mynta u bnai ha Kolkata. |