Chandigarh:Ki ar ngut ki koidi kiba dang shong along haduh mynta mynne ki la jop kum ki dkhot jong ka ïingdorbar thawain Lok Sabha na jylla Kashmir bad Punjab.
Kine ki ar ngut ki koidi kata u Shrik Abdul Rashid, u ba la jop na Baramulla Lok Sabha seat jong ka Jammu Kashmir hadien ba la pynliem noh ia u myntri rangbah barim jong ka jylla u Omar Abdullah da palat 2 lak vote.
U Rashid u ba dei u MLA barim jong ka ïingdorbar thawain ka jylla Jammu and Kashmir na awami ka jaka pdeng jong ka jylla Jammu Kashmir, u don ha along ha Bihar hadien ba u la shah pynngat ba u donkti ban bei pisa ia ki kynhun ban thombor bad leh ia ki kam sniew naduh ba u la shah kem ha u bnai nailar jong u snem 2019, ki nongkyrshan jong u Rashid ki la ialeh kmen ha ka shnong trai ka jong u ha kaba la lamkhmat da u khun jong u,u ba dei ruh u nongialam ba ha khmat ban leit ialap elekshon ia u Rashid.
U Omar abdullah u la ai khublei kitbok ia u Rashid bad pdiang ruh ia ka jingshah rem, ha kaba u la ong ba ka dei ka mon laitluid jong u paidbah ban jied ia ki nongthawaiñ.
Katba u Amritpal Singh u dei sa u wei pat u koidi u ba la jop kum u dkhot jong ka ïingdorbar thawain Lok Sabha u ba la shah jied na Khadoor Sahib seat ha kaba u la tam ia u kyrtong ba hajan tam da 2 lak vote.
U Amritpal Singh u la shah set along ha Assam hadien ba u la shah kem.
Ka jylla Punjab ka dei kawei na ki jylla ba shah ktah jur bha na ka jingdon jong ki seng lehnoh ha ki 80 khlieh bad ka jingjop jong u Singh ka dei na kiba bun kiwei pat ki daw ba la pynkiew skong.
Phi don ban ong eiei?