Shillong: Ki thei ka Sacred Heart Higher Secondary School ki la rah ia ka nam lahduh hadien ba ki la lah ban pynliem ia ki thei ka Christ Church Higher Secondary School da 32 la 28 basket haba iakhun ia ka phainal ka Inter School Basketball Tournament ba la pyniaid da ka Phudmuri Presbyterian HSS, Mawlai Phudmuri kaba long shi bynta jong ka jingrakhe ia ka Jubili Rupa ha madan basketball jong kane hi ka skul hynnin ka sngi.
Napdeng ki phra tylli ki skul kiba la shim bynta ka Sacred Heart Boys HSS ka la iohrah ia kane ka nam hadien ka jingiakhun kaba itynnat bad kaba shongshit bha, haba iakhun pyrshah ia ka Christ Church HSS.
Haba phai sha ka jingiakhun, baroh ar tylli ki kynhun ki la iakhaid bad ia ryngkat bor bad haba kut ka por ba la buh ban ialehkai (normal time) ki la iakhaid da 23 la 23 bad ban ioh ia ka kynhun kaba jop bad kaba rem ki la hap ban pyniakhun biang bad khatduh ka Sacred Hearts Boys ka la iohrah da kaba ioh thep biang sa da 9 la 5 basket.
Ha kane ka sngi la sam ruh ia ka khusnam sha ka thei ialehkai basketball kaba tbit tam, ba la ioh khur da ka Labiangdor L Lyngkhoi kum ka Most Valuable Player.
Ki skul ba la shim bynta nalor ka Sacred Heart bad ka Christ Church, ki hynriew tylli kiwei ki kynthup ia ka Mawlai Presbyterian HSS, Church of God HSS, Mawlai Christian SS, OM Roy Memorial HSS, Nongkwar HSS bad ka Phudmuri HSS, kaba pyniaid.
Kumba shu kdew ka Phudmuri Presbyterian HSS ka la sdang bad plie pyrda ia kane ka jingrakhe ha ka 24 tarik u Iaiong, 2019 bad kan rakhe ia ka baroh shisnem. Haba ia dei bad ki jingialehkai sport, dangshen ka la dep pynkut ia ka ialehkai phutbol ha madan heh ba la iohrah da ka OM Roy Memorial Higher Secondary School hadien ba ka la pynliem ia ka Sacred Heart boys Higher Secondary School da 2-0 ha ka final ba la iakhun ha ka 12 tarik u Naitung, 2019.
U Bah Metbah Lyngdoh, MLA Mairang u la long u Kongsan ha kane ka sngi bad u Bah Gavin M Mylliem, MLA Sohra kum u symbud Kongsan ha ryngkat ka jingdonlang ki dkhot ka managing committee, ki nonghikai bad ki khynnah skul, kiba la pynshongshit ia kane ka sngi.
Haba ai jingkren u kongsan u bah Metbah u la pynpaw ia ka jingkmen ba u la ioh ia ka kabu ban don bynta lang haba rakhe ia ka Jubili Rupa kaba ki rakhe baroh shisnem bad kaban kut ha ka 2020.
Haba kren sha ki thei ialehkai u la ong ba ba kam pher la jop ne rem, hynrei kaba kongsan ka long ba ki dei ban don pat ia ka mynsiem iakhun.
Haba pynkut u la kyntu ruh ia ki khynnah skul ba kin minot bad trei shitom ban pass bha bad ban wanrah nam bad burom ia ka skul.
Ia ka trophy sha ka nongjop ka Sacred Heart Boys HSS la sam da u bah Gavin Mylliem.
Phi don ban ong eiei?