Shillong: Ka kynhun ialehkai ki heprit ka Wahlakhiat Bulls ka la jop baroh san tylli ki jingialehkai phutbol pyrshah ia ka Unified Gorkha Gators ha ka sien ialehkai kaba 11 jong ka Meghalaya Baby League 2018, kaba dang iaid shaphrang haduh kine ki sngi man ka sngi Saitjain ha madan JN Stadium, Shillong.
Ha ka jingialehkai ha kane ka sngi Saitjain, ka Touchline NE Cubs bad ka Mawlatbah SC Hawks ki la jop ar tylli ki jingialehkai.
Ka ENE Falcons bad ka Sunnydale School Doves ki la iakhaid ha ka jingialehkai kiba ha ka rta 4-5 snem hynrei ka Falcons ka la ioh ban jop ruh ha kawei ka jingialehkai katba ka Doves ka la jop ha ka jingiakhun kiba hapdeng ka rta 10-11 snem.
Ka Kickstart FCC Rhinos ka la pylliem ia ka JNS Jaguars, ha kaba ka la jop saw tylli na ki san tylli ki jingialehkai katba ka Jaguars ka jop kawei.
Ka Nongthymmai GC Scorpions bad ka Little Star Clouded Leopards ki la iakhaid ar tylli ki jingialehkai katba ka Clouded Leopards ka la jop pat ha ki ar tylli ki jingialehkai bad ka Nongthymmai ka jop ha kawei ka jingialehkai jong kiba ha ka rta 4-5 snem.