Jop ka Smit bad ka Assam Rifles ha ka phutbol shipai ha Laitkor

Shillong: Ka Smit kaba dei ka lahduh mynshem bad ka Assam Rifles ki la ioh ia ka jingjop ha ka jingiakhun myn hynnin ka sngi ha ka 4th Assam Rifles Invitational Football Tournament ba long ha madan shipai ha Laitkor.

Ha ka jingiakhun por mynstep, ka Smit ka la pynliem ia ka Kith United da 4-1 katba ka Assam Rifles ka pynliem da 5-0 ia ka Umphrup.
U Banpynkhrawnam Nongkhlaw ka Smit u la thep ha ka 4 minit bad u paralok jongu u Wallamsuk Nongkhlaw u la pynkiew jingkhein ha ka 32 minit. U JL Marshillong u la thep kawei ia ka Kith United ha ka 41 minit. Ka Smit ka la thep biang sa ar da u Banshanlang Nongdhar (61′) bad u R Khongjoh (80′).
Ha kawei ka jingialehkai, u Lalboy Kipjen ula thep 3 kol ia ka Assam Rifles ha ka 32, 54 bad 58 minit.
Kawei la thep da u M Chetry ha ka 84 minit bad sa ha ka 88 minit ban pyntam syndon 5-0 ia ka Umphrup.
Lashai ka sngi, ka Mawpdang pyrshah ia ka Madanryting por 10:30AM, bud sa ka Nongthymmai pyrshah ia ka Nongkrem por 1:30 PM ha madan Assam Rifles ha Laitkor.