Jop ka Shillong A bad Tura District A ha ka match jong ka Megh cricket Association’s Inter District U-23

Shillong: Ka Meghalaya Cricket Association Inter-District U-23 kaba la pynlong myn hynnin ka sngi ha Nongpoh, ia ka nam jop la rah da ka Shillong Cricket Association A bad kaba la pynlong ha Mendipathar pat la ioh rah ia ka nam jop da ka Tura District Association A.

Ka Shillong Cricket Association A kaba la ialeh ha ka kynhun jong ka Zone 1 ka la ioh ia kane ka jingjop pyrshah ia ka East Khasi Hills Cricket Association hapoh ka inning bad da kumba 110 run, katba ha ka Zone 2 pat ka Tura District Cricket Association A ka la jop pyrshah ia ka East Garo Hills hapoh ka inning bad 29 run.Haba bteng biang ia ka jingialehkai na ka 15/5 ha ka inning kaba 2 kaba la buh hakhmat ban bud da ka SCA-A, ka EKH ka dang don ha ka run kaba 185 shadien jong ka SCA-A. na ka liang u Winningstar Khongjoh (28) bad u Wankitlang Nongpluh (18) ki la ialeh pyrshah katba lah hynrei ha kaba kut ka EKH ka la hap ban kut noh ha ka 90, kaba pynpaw ba kane ka kynhun ka la ialehkai kham bha haba ianujor bad ka inning kaba nyngkong haba ki kamai tang 76. Na ka liang jong ka SCA-A ka la jied ia u Abhishek Kumar ban kawang bol ha kaba u la lah ban kamai ha kane ka kynti 5/13 (ha ka match pat 7/22) katba u Bipin Ray u ioh 2/12.
Ha kawei pat ka jingialeh kaba la sdang mynta ka sngi, ka TDCA ka la hap ban tied bol hadien ba ia ka toss ia jop da ka EGH. U Sengpan T Sangma u la lam khmat da kaba kamai 87 ia ka kynhun jong u kaba la ioh 205/10, hynrei u la shah mait noh ha u Prakash Prasad uba la ioh pynkyllem haduh 6/54.

Hadien kane ka EGH ka la shah pynkut noh tang 69. Tang Saw ngut na ki nongtied jong ka ki la kot ban kamai 10 run shakhlieh, hynrei uba heh duh na ki kata u Anaiush B Marak u ioh tang 19 run. Na ka liang ki nongkawang bol u Cham Sangma (4/7) bad u Purav Agarwal (3/17) ki dei ki nongkawang kiba biang ha kane ka sngi.

Da kane ka East Garo Hills ka la hap ban bud biang da ka jing kyrmen ba kan leh bha ha ka inning kaba 2, hynrei kaba la khyllem lut pat baroh ki wicket da 107 run. Ha kane ka kynti u Prasad u la lam khmat ban tied bol, uba la lait salit pat ban ioh half century (49), katba u Agarwal u ioh 4/28 (ha ka match pat u ioh 7/45) bad da kane u la ioh ban khur ia ka nam u Rangialehkai ba Kynsai jong kane ka match.