Jop ka Raid Nongpoh ia ka Shillong Lajong, ha ka jingialehkai paralok

Nongpoh:Ha ka jingialehkai paralok kaba la long hapdeng ka Raid Nongpoh pyrshah ia ka Shillong Lajong FC, kaba la long mynta ka sngi ha Madan NSCA Pahamsyiem, ki rangialehkai ka Raid Nongpoh, ki la lah ban pynliem noh ia ka Shillong Lajong da 3-1, ha ka jingiakhun kaba la poi shaduh ka jingiashut Tie Breaker.

Ia katei ka jingialehkai paralok, la pynlong da ki nongialam ka Raid Nongpoh, ha kaba ka jingthmu hi ka long na ka bynta ban pynmih pisa ia ka skul Nomiwell Secondary School kaba don ha Nongpoh bad kiba la sakhi ha katei ka sngi, ki kynthup ia u Bah Bobby L. Nongbet, DSO ka Ri Bhoi, ki nongialam ka Raid Nongpoh lem bad kiwei.

Ha katei ka jing ialehkai paralok, ki la don shibun ngut ki paidbah kiba la leit ban sakhi ia katei ka jingiakhun kaba itynnad bad kaba iakhaid eh, namar la ialehkai da ki rangialehkai ba kynsai na kylleng ki jaka jong ka Ri Lum Khasi Jaintia.

Khyndiat haba phai sha katei ka jingialang, ka la long ba ha ka kylla step ka la kut ha ka jingiakhaid kaba ym don kiba pynkhih jar. Hynrei haba bteng ka kylla miet, ki rangialehkai ka Raid Nongpoh, ki la ioh ban lamkhmat ban pynkhih jar nyngkong, pynban tang kumba katto katne minit, ki rangialeh kai ka Shillong Lajong ki la ioh ban pynphai bad pyniakhaid, kaba la neh haduh ba kut ka jingia khuh. Haba ka jingiakhun ka la kut ha ka jing iakhaid, na ka liang ki nongpyniaid ia ka jingia khun, ki la rah noh sha ka Tie Breaker bad dei ha ka jingiashut Tie Breaker, kaba la pynlong ia ki Raid Nongpoh ba kin pynliem noh ia ki rangialehkai ka Shillong Lajong FC.