Jop ka Meghalaya, ha ka jing iakhun pyrshah ia ka Arunachal Pradesh

Shillong: Ka jinglehkai ba myn ha ka sngi saitjain jong ka Vijay Hazare Trophy ha Chennai, ha ka jingioh half century jong uwei u samla uba na Nongpoh u Rohit Shah ka la pynkiew sha ka lynti ka jingjop ia ka Meghalaya da 8 wicket pyrshah ia ka Arunachal Pradesh kaba hapoh kane ka kynhun.

U Shah uba la mih nyngkong na ka liang ki nongtied u la lah ban kamai 70 run da 84 bol haba ka Meghalaya ka la ioh 157/2 hapoh ka 28.5 over hadien ba ka la pyrkhing bha ia ka Arunachal tang da 153 bad pynliem lut ia baroh ki wicket ha ka inning kaba nyngkong, u Chengkam Sangma uba la mih madan nyngkong ha kane ka tournament u la ioh 3/21.

Nalor jong u, kiwei pat ki nongkawang bol kiba la pynkhyllem wicket na ka bynta ka Meghalaya ki long u Sanjay Yadav (2/30), Ravi Teja (1/13), Aditya Singhania (1/24) bad u Abhay Negi (1/37).

Ha ka jingbeh thong jong u Shah u la ioh ban thlieh 8 tylli ki 4 bad u Yogesh Tiwari 28 run da 25 ball kaba la buh da 47 na ka bynta u wicket ba nyngkong. U Lerry Sangma u la pynkamai shuh sa 12 bad u Ravi Teja 32 ba la iaineh haduh kaba kut hadien ba ka Meghalaya ka la leit phai da ka jingjop da 8 wicket bad pynsah sa 21.1 over.