Ka Manchester City, ka la ia khaid da 2-2 ha ka jing iakhun pyrshah ia ka Lyon, ha ka jingialehkai Champions League hynnin ka janmiet. La thep ia ki kol na ka liang jong ka Lyons da U Maxwel Cornet ha ki minit ba 55 bad 81, katba na liang jong ka Manchester City, la thep da U Aymeric Laporte ha ka minit kaba 62 bad U Sergio Aquero ha ka minit kaba 83. Kat haduh mynta ka Man City, ka dang wan ha khmat duh, ha ka Group F, da kaba ka ioh 10 point.
U Arjen Robben, u nong ialehkai ka Bayern Munich, uba dang leh kmen, hadien ba ula ioh thep kol
Ha kawei pat ka jingialehkai ka Manchester United, ka la jop da 1-0 ia ka Young Boys, ha ka jingiakhun hynnin ka miet. La ioh thep ia ka kol, na ka liang ka United da U Fellaini ha ka minit kaba 90. Da katei ka jingjop ka United ka ioh 10 point, katba ka Juventus, ka ioh 12 point ha ka Group H. Na ka liang ka Juventus, ka la jop da 1-0 ia ka Valencia, ha kaba ia ka kol, la ioh thep da U Mandzukic ha ka minit kaba 59.
Ka Real Madrid, ka la pynliem da 2-0 ia ka Roma, ha kawei pat ka jingialehkai ha ka Group G, ha kaba ia ki kol la ioh thep da U Bale ha ka minit kaba 47 bad U Lucas ha ka minit kaba 59. Lyngba katei ka jingjop ka Real, ka ioh mynta 10 point. Nangta ka Bayern Munich ka pynliem da 5-1 ha ka jingialehkai pyrshah ia ka Benfica bad lyngba katei ka jingjop ka Bayern ka ioh 13 point ha ka Group E. Ia ki kol, na ka liang jong ka Bayern la ioh thep da U Robben, ha ki minit kiba 13 bad 30, nangta sa U Robert Lewandowski ha ki minit kiba 36 bd 51 bad nangta sa U Franck Ribery ha ka minit kaba 76, katba ia ka Benfica, la ioh thep da U Gedson Fernandes ha ka minit kaba 46.