Ahmedabad:U wei u kyrtong jong ka parti BJP u ba iakhun ia ka elekshon Loksabha 2024 na jylla Gujarat, u lah ban dei u kyrtong u ba nyngkong duh ban jop ia ka elekshon Loksabha 2024, hadien ba baroh ki kyrtong kiba iakhun pyrshah ia u ha kane ka elekshon ki la weng kyrteng noh.
Une u kyrtong jong ka parti BJP ia u ba la tip kyrteng kum u Mukesh Dalal ha ka sngi nyngkong u la shah jied khlem da don kiba iakhun pyrshah na Surat Loksabha Constituency jong ka jylla Gujarat, hadien ba baroh kiba la thep kyrteng ban iakhun ia ka elekshon na katei ka constituency ki la weng kyrteng noh,ïathuh ki tyllong khubor sorkar.
Kane ka dei ka jingjop ba nyngkong jong ka parti BJP, ha kane ka elekshon Loksabha kaba dang iaid shakhmat.
“Ngi la pynbna ba u Mukesh Kumar Chandrakant Dalal,u ba la pynieng da ka parti BJP, u la shah jied kum u dkhot jong ka ïingdorbar Lok Sabha na Surat Parliamentary Constituency” , la ïathuh u district collector u ba dei ruh u election officer u Saurabh Pardhi u la ïathuh sha ki lad pathai khubor, hadien ba la dep ban ai syrnot sha u Dalal kum u nongjop.
Ka jingthep vote na ka bynta jong ki 26 tylli ki constituency ha jylla Gujarat kan long ha ka 7 tarik, hynrei na kane ka resol ba la dep mih ka elekshon kan long noh tang ha ki 25 tylli ki constituency.
Ki phra ngut ki kyrtong kiba la thep kyrteng ban iakhun na Surat, ha kaba saw ngut ki kyrtong shimet,lai ngut na ki parti rit bad Pyarelal Bharti jong ka Bahujan Samajwadi parti ki la weng noh ialade ban iakhun ia ka elekshon ha ka sngi ba khatduh, katkum ka jingiathuh jong ka district election office jong ka Surat.
Ka kot thep kyrteng jong u kyrtong jong ka parti Congress u Nilesh Kumbani na Surat seat, la kyntait noh ha ka sngi u Blei hadien ba u District returning officer u la shem ba ka don ka jingiapher haba iadei bad ka jingsoi kyrteng jong une u ba thep kyrteng.
Ka kot thep kyrteng jong u kyrtong bynrap jong ka parti na Surat ka long ka bym biang.
Phi don ban ong eiei?