Jling shah pynliem u pyrsa trai u bah Prestone ha u Prah

Shillong:Ka jingshah rem u pyrsa trai jong u symbud myntri rangbah u bah Prestone Tynsong na Lyngkyrdem-Laitkroh ha u kyrtong ka VPP, u bah Shemborlang Rynjah ka la pynkyndit ia ki paidbah ka thain riwar.

U bah Shemborlang ula pylliem ia u Pyrsa u bah Prestone, u bah Rahboklang Tynsong da 1489 vote. U bah Shemborlang u ioh 11279 katba u bah Rahboklang u ioh 9790 vote.
Ka Lyngkyrdem-Laitkroh konstitwensi ka dei ka ktem kaba ju jop u bah Prestone la 25 snem haduh mynta bad ka la don ka jingkyrmen na ki nongkyrshan ka NPP ba kan jop suk na katei ka jaka hynrei phewse pdik, ka la shah pylliem ha u kyrtong ka seng sain pyrthei thymmai kaba dang shu mih shen. Ia ka Lyngkyrdem-Laitkroh konstitwensi la mihkhmat da u bah Ryngkatlang Lyndem na ka UDP ha kine ki 6 snem hynrei ka UDP ka la hiar jain rynjain haduh ba ula ioh tang 12 spah vote tam.

Ha kawei ka liang, ka Kong Grace Mary Kharpuri ka la biang biang na Nongshken ha ka sien kaba saw hadien ba ka la pylliem ia u kyrtong ka VPP, u bah Manbha Thabah da 3000 vote tam. Ka Kong Grace ka ioh 12426 vote katba u bah Manbha u ioh 9113 vote.