Jlam kynjah ka Secreteriat, namar ka pakhang ophis

Shillong, 17 Nailur:
Ka pakhang ophis ba la khot pynlong da ki 10 sengbhalang ka la long kaba jop mynta ka sngi. Ka Secretariat kaba dei ka jaka treikam kaba heh tam ha ka jylla kaba shong ki myntri sorkar bad ki heh ophisar ka la kynjah naba ym don ba wan trei. Ka East Khasi hills district ka dei kaba shah ktah eh ha kaba tang 15 percent ki nongtrei ki la wan trei katkum ka jingkhein ba la ai da ka sorkar.
Ki shiphew tylli ki sengbhalang ba la kyrshan da kiba bun kiwei pat ki kynhun, ki la khot pynlong ia ka pakhang ophis hynne ka sngi ban dawa ba ka sorkar ka dei ban pyntreikam noh ia ka Inner Line Permit (ILP) ha ka jylla.
Ki sengbhalang ki la khot pakhang ophis mynta ka sngi, ba bud da ka pakhang surok miet bad ruh ha ka 19 tarik ha baroh kawei ka jylla katba ha ka 20 tarik kan don ka pakhang shnong ba 24 kynta naduh ka por 5 baje mynstep haduh 5 baje mynstep ka 21 tarik.
Ki ophis sorkar ki la thut lut na kane ka pakhang ophis jong ki sengbhalang namar ba ki nongtrei kim shym la poi sha ophis. U principal secretary (home) ka jylla u KS Kropha u la iathuh ba ka jingwan trei ha secretariat bad ha kiwei ki directorate ka long 50 percent.
Hynrei ha nongbah Shillong, bun ki ophis kum ka District Transport Office (DTO), Public Work Department (PWD) , Public Health Engineering (PHE) department, DHS, bad kiwei ki khang namar ba ki nongtrei kim shym la wan.
U deputy commissioner ka East Khasi hills u Sanjay Goyal u la ong ba ka jingwan jong ki nongtrei sorkar ha ka district ka long 15 haduh 20 percent.
Ha West Jaintia hills district u DC u Bah PS Dkhar u la kam ba ka jingwan trei ka long 76 per cent.
Ha Ri Bhoi district ka long 38 percent, ha South West Khasi hills ka 78, ha West Khasi hills district ka 70 per cent, bad East Jaintia hills ka 65 per cent.
Ha kajuh ka por, ki pulit ki la pynjur ia ka jingpahara ha baroh kawei ka jylla khamtam ha ka nongbah namar ka jingiakhih jong ki sengbhalang.
Ki deputy commissioner jong baroh hynniew tylli kiba don ha Khasi Hills, la bthah ba kin pynneh ia ka suk ka sain.
U Chief secretary ha kane ka sngi Nyngkong u la khot ia ka jingialang jong ki heh sorkar ban pynneh ia ka suk ka sain bad ban shim ia ki lad ki lynti ban iada na ki runar kiba pynthut ia ka suk ka sain.