Jingshngiam u sohniamtra na Meghalaya, ong ki nong Bengaluru

Bengaluru:Ban kyntiew ia ka ioh ka kot jong ki nongrep bad ia ka jylla hi baroh kawei, mynta ka sngi thohdieng ka 15 tarik u Nohprah 2023, na ka liang ka sorkar jylla ka la pynlong ia ka Zestfest (Meghalaya Khasi Mandarin) ha nongbah Bengaluru ka jylla Karnataka.

Ha kane ka jingpyni nam ia ki marrep ki la don shibun ki ba la ia shimbynta, ban sei ia ki mar ki mata jong ki ha kane ka tamasa, ki ba dei na meghalaya ki ba kynthup ia u Soh Ñiamtra, u Soh Trun bad kiwei kiwei de ki mar rep. Ia kane ka prokram jingpyni nam la sdang naduh ka 14 tarik haduh ka 17 tarik, ha kaba la pynlong ha Bengaluru ka phyllaw ki dukan bah ha LuLu Mal, Bengalore, Forum Mall, Kanakpura bad ka Lal Bagh Batonical Garden.

Kane ka dei ka sien ka ba nyngkong ha kaba ki nong Meghalaya ki ioh kum kane ka lad ban pyni nam ia ki soh jong ki, shaduh sha bar jong ka jylla, bad kane ka dei lyngba ka jingialam jong ka sorkar jylla.
La sakhi ruh ha kane ka sngi, ki paidbah ki ba na kylleng ki jylla bad ruh ki ba na kiwei pat ki ri ka pyrthei, ki la wan ban ia lum khrui ha ki dukan ba shong pyni nam ki nong Meghalaya ban thied bad bad ban bam ia u Soh Ñiamtra u ba bang bad u ba thiang.

Kane ka jingpyninam kam dei tang ban shu pyni ia ki mar rep jong ki nong Meghalaya, hynrei ka dei ruh shibynta ban burom ia ka jingtrei shitom jong ki nongrep bad ka jingriewspah ki marrep jong ka jylla Meghalaya.
Ha ba ioh ban iakren bad ki Khasi ki ba wan ban pyninam ia kine ki marrep ki la ong, ba kane ka dei ka sien ka ba nyngkong ba kin wan poi ha Bengaluru ban pyni nam ia ki marrep jongki. Ki la pynpaw ruh ka jingsngewnguh ia ka sorkar jylla ba ka la ai ia kaba kum kane ka lad na ka bynta ban pyninam sha ka pyrthei hi baroh kawei.
Ha kaba iadei pat ban ka jingwanrah ia ki soh Ñiamtra na ka jylla Meghalaya ki la pynpaw, ba ym baroh ki bha lut haduh ban da poi sha Bengaluru, hynrei ki don bun kiba la paid, ba jem, ki ba la bam khñiang bad ki bym long shuh wat tang ban bam namar ki lah sniew na ka jingjngai palat ka lynti.

“Kane ka dei ka jingsdang bad ki briew ruh kim pat tip bha ia kum une u soh Ñiamtra, ka jinglong kyrpang ka jingbang bad ka jingthiang, bad ynda ngi la ioh biang ia kum kane ka program ngin sa nang pynithuh shuh shuh ia ki paidbah ha kaba iadei bad ka dor ruh kumjuh”, ki la bynrap.
Ki la pynpaw ruh, ba kim kwah ban kut tang mynta ka sngi, hynrei ki kwah ba ka sorkar jylla kan pynlong biang ia kum kine ki jait program ban pyni nam, na ka bynta sa kiwei pat ki mar rep Khasi ba kin kiew bad ban donnam.