Jinglen U Petros

Jisu hashwa ban sah narphna,

Ha ki synran lah iathuhlypa;

Ia U Nongsharai yn pynlwet,

Ia ki langbrot yn pynsaphret.

• Jisu sha ki synran U phai,

Hapdeng ka jinglyngoh khuslai;

Namar Jisu U sngewthuh shai,

Ka por lah jan ba un leit phai.

• Hangta ia ki synran U ong,

Bad phi ngam lah ban sah junom;

Sa shibit arbit ngan leit noh,

Kamram ha phi ngan ai baroh.

• Petros da jinglyngoh u peit,

Ko Trai shano Me mut ban leit;

Me tip ko Trai ngan nym lyndet,

Na Me dashisha ngan ym phet.

• Jisu U ong ia u hangta,

Mem lah ban bud ia nga mynta;

Ynda lah biang ka por ka ia,

Hangta men ioh ban bud ia nga.

• Petros sha U Jisu U phai,

Balei ngam lah ban bud ah Trai;

Ia ka jingim ngan aiti lut,

Namar jong Me haduh bakut.

• Petros u phla da jingsngewskhem,

Sngew bym lah shuh ban pynkhyllem;

Jisu U ong, pat sa shisien,

Petros men len ia nga lai sien.

• Petros me lah ban phla shitrhem,

Dashisha lai sien men sa len;

U syiar un nym pat riew hangta,

Katba mem pat pyndep ia ka.

• Kumba U Trai U iathuhlypa,

Kumta ka long bad ka la jia;

Ha phyllaw iing Rangbah Lyngdoh,

Lai sien laiwat ula len noh.

1. Tang dep ban len la  riew u syiar,

U Trai sha u Petros U phai;

Petros ula kynmaw hangta,

B’U Trai ulah dep iathuhlypa.

1. Kynsan ulah shem jingkynduh,

Ia U Jisu um lah peit shuh;

Ym tip shuh da kumno yn leh,

B’u lah len ia u ba ieid eh.

1. Petros nangta shabar u mih,

Jinglyniar kthang b’u lah sngewsih;

Khatduh sha la U Trai u phai,

U kloi ba im jingim thymmai.

1. Lyngba kane kein ka jingjia,

Ka kyntu ruh ia phi ia nga;

I’U Trai Jisu wat ai ngin len,

Da ki kam ne da ktien ba kren.

1. Hynrei ngin im jingim babha,

Ba kiwei kin iohi Nuksa;

Da ki kam bad jingleh jong ngi,

Ia U Trai ngin long ki sakhi

La thoh da U Mr. Mebanshaniah S. MarbaniangEmail: [email protected]