Shillong: Ka Senior Selection Committee jong ka Meghalaya Cricket Association katkum ka rukom pyniaid kam jong ka BCCI, ka la dep ban jied ia ki 15 ngut ki rangialehkai ki ban mihkhmat ia ka Meghalaya na ka bynta ka Vijay Hazare Trophy, Plate Group ka ban sdang naduh ka 24 tarik mynta u bnai ha Dehra Dun.
Kine ki rangialehkai ba la pynpaw kyrteng ki dei kiba la shah jied tang na ka bynta ka Vijay Hazare Trophy, ki long , u Amiangshu Sen, u Dipu Sangma, u Wallambok Nongkhlaw, u Syllvester Mylliempdah, u Raj Biswa, u Larry Gomes Sangma, u Tengchan Sangma, u Aditya Singhania, u Abhay Negi, u Akash Chaudhary, u Wallam John Lyngdoh, u Swarajeet Das, u Punit Singh Bisht (Professional Guest Player – BCCI approved), u Ravi Teja (Professional Guest Player – BCCI approved) bad u Sanjay Yadav (Professional Guest Player – BCCI approved).
Kumba ju long, lai ngut ki rangialehkai ba la tbit ki dei ba na shabar, ba la ai jingbit da ka BCCI. U Punit Bisht uba dei u wicket keeper batsman u la long biang u professional guest player namar ka jinglah jong u ban ialehkai bha ha ka aiom ba la dep na ka bynta ka Meghalaya. U dei u nongtied run ba wan ba-ar ha ka jinglah kamai run bun tam ha ka jingialehkai jong ka Ranji ha ka ri kata ha baroh ar ha ka elite bad plate group.
Napdeng kitei kiwei pat ki arngut ki professional guest player kiba la shah jied mynta ka aim ki long u Ravi Teja, uba la ialehkai ha ka Ranji na ka bynta ka Hyderabad bad uba la long captain haduh ba un da leit pyniasoh noh bad ialehkai na ka Andhra Pradesh. U dei u nongtied bad ruh u all rounder uba tied da ka mon bad ruh u nongkawang bol kamon. U la mihkhmat ruh ia ka South Zone, India A bad kiwei bad u la ialehkai ruh na ka bynta ka Deccan Chargers bad ka Sunrisers Hyderabad ha ka IPL.
Uwei pat udei u Sanjay Yadav uba ialehkai na ka Tamil Nadu ha ka jingialehkai kriket hapoh ka jylla. U dei u batting all-rounder uba tied da ka diang bad ruh bol da ka diang. U dei ruh uba la soi da ka Kolkata Knight Riders ha ka 2017 IPL.
U Coach pat u dei u Gautam Shome uba dei u nongialehkai Ranji ba mynshuwa jong ka Bengal bad ruh u u coach ba la ioh jingithuh na ka National Cricket Academy uba la hikai ruh ia ka kynhun ka Bengal la katto katne snem.
Phi don ban ong eiei?