Ka seng United Hynniewtrep Movement ka la ia kynduh lang ha ka 3 tarik u Naiwieng 2018 ha Assembly Hotel, Shillong. Ha kane ka sngi ka seng ka la thung bad jied thymmai ruh ia ki nongkitkam ki jongka ki ba kynthup ia u President u samla Banpynskhemlang Lyngdoh Nonglait, Vice-President Kong Irene Moksha, General Secretary Charlie J Rani, Organising Secretary:- Presterlang Lartang, Publicity Secretary Samuel Pyngrope, Education Secretary Fridaystar Thangkhiew, Social & Cultural Secretary Wallambiang Lyngdoh, Finance Secretary Jovial Lyngdoh Nonglait Environment Secretary Ban Lapang bad u Sport Secretary John Umdor.
Ha kane ka sngi la pynsmai ia ki dkhot ki ba thymmai da u President barim jong ka seng kata u Bah Gilbert Dkhar. Ha ka jingai jingkren ha ka jingialang U President barim u la ai ka jingkyrkhu kyrdoh ia kine ki dkhot ki ba thymmai ba kin nang trei shitom ban buddien ia ki kam ba dang sahteng jong ka seng. Kumba ka jingthmu jong ka seng ka long ban shakri ia ka Ri bad ka Jaitbynriew ha ka ban rat dyngkhong ia ka jingbieit bad jingkyrduh, ka Imlang sahlang, ka Roi ka Par bad ka Mariang kumta ruh u ne u rangbah u kular ban ai ka jingkyrshan ia ka seng ha ki por ki ban wan. Ki dkhot ki ba la ia don lang ha kane ka sngi ba khraw jong ka seng UHM ki long ki dkhot baroh jong ka kumjuh ruh ki ba haiing hasem jong ki dkhot ki ba shah jied ban long kum ki nongkitkam ba thymmai jong ka seng.