Shillong: Ka jingialang ka UDP East Khasi Hills District myn hynnin ka sngi, ka la pynkhamti biang ia ka kam president ha u bah TW Chyne uba dei u MDC ka Sohra bad u MLA barim. U Bah TW Chyne u la bat ia kane ka kam president ka party ha kane ka samoi ba la dep ruh. Kiwei pat ki nongkitkam kiba la jied mynta ka sngi ki long Vice-President – Kris Kharsati, bad bah Alando Suin, General secretary- bah Teinwel Dkhar, uba long u CEM ka KHADC.
Haba kren hadien ka jingialang, u bah TW Chyne u la iathuh ba ka jingialang ka la rai ban pynkhlain ia ka party ha baroh 11 tylli ki konstitwensi ba don ha ka East Khasi Hills bad khamtam ha kito ki jaka bym pat don MLA ban wad noh ia u kyrtong ban pynkhhreh ia ka elekshon 2023.
“Ka jingialang ka la iakren ruh ban trei shitom ban pynjop ia u kyrtong na ka bynta ka elekshon shiteng samoi ha Shella kaban sa long shen”, la ong u bah TW Chyne.
Na ka bynta ka jingialang bah ne ka General council kaban long ha ka 11 tari mynta u bnai, la rai ba na East Khasi Hills district, yn pynpoi ia ki nongialam ka party ym duna ia ka 100 ngut.
Phi don ban ong eiei?