Jied ka HSPDP ia U bah Ardent kum u Acting President

Shillong, 6 Risaw:
Ka Central Executive Committee jong ka seng HSPDP kaba la long mynta ka sngi ha ïng sah u bah Ardent Miller Basaiawmoit ha Lad Nongkrem ka la jied ia u bah Ardent kum u Acting President jong katei ka seng.
Ha katei ka jing ialang, la jied ruh ia kiwei pat ki nongkitkam ba shipor jong katei ka seng kaba la tip kum ka Adhoc Body bad ia baroh ki nongkitkam kiba la jied thymmai mynta ka sngi yn tyrwa ha ka General Council la kan mynjur ne-em bad hadien ba la ioh jingmynjur kin long noh kum ki nongkitkam ba pura jong katei ka seng.
Ha ka jingshisha ka HSPDP ka la buh ba ia ka General Council kan long ha ka 23 tarik u risaw, hynrei na ki kam kiba kyrkieh ba katei ka seng ka hap ban pynpoi ia ki kot ki sla sha ka Election Commission sha Delhi la rah noh ia katei ka jingialang bah sha ka 16 tarik mynta u bnai. Ka General Council kan long ha ka 16 tarik u risaw ha State Central Library ha ka por 11 baje mynstep.
Kiwei pat ki nongkitkam ba ka seng HSPDP ka la jied mynta ka sngi ki long Vice President u bah K.P Pangniang MLA ka Rambrai, General Secretary bah Witting Mawsor, MLA ka Mawshynrut, Joint Secretary u bah Nolip Lyngdoh President ka HSPDP na South West Khasi Hills District, Finance Secretary u bah Pynshongdor Lyngdoh Nongbri bad u Treasurer la jied ia u bah Shem Khardewsaw.
Ki nongialam ka seng HSPDP kiba la shong ha katei ka jingialang ki la ong ba ki la don ki nongtyrwa ia ka kyrteng ki kyrtong kiba kwah ban ia khun ia ka kam President, hynrei la khang lad ia ki namar ba kim kwah ban mih ka elekshon jied nongkitkam namar ba lada jia ba mih ka elekshon ka lah pynban ban mih ka jingiapait hapoh katei ka seng. Kumta la kyrpad ia kiwei pat ki nongialam ba kin ym tyrwa kyrteng hynrei ban jied beit ia u bah Ardent ban shimti ia ka kam nongialam namarba u la dei lypa u Vice President jong katei ka seng.
Ha katei ka jingialang ki nongialam jong katei ka seng ki la iathuh ruh ba baroh ki la bam smai ban ia tylli hapoh ka seng ym ban ia sa phret, ki la bam smai ba kin long kiba ia sngewthuh jingmut ym shuh ban shim rai marwei la ha kino kino ki mat ia khih. Hadien ba la mih katei ka jingbam smai ban ym ia shim rai shuh marwei khlem ka jingiasngewthuh jingmut lane ka jingkynjoh ktien ha ka seng.
Katei ka jingialang ka la pynpaw ruh ka jingsngewkhia namar ka jingshah iehnoh marwei ka seng HSPDP hapoh ka ARPA hadien ba la mih noh ka UDP bad ka KHNAM, hynrei kim shym la pynduh pyndam satia ia ka ARPA bad ki la hun ban shu iehnoh kumto kumba ka long mynta. Hadien ka jingrisaiñ noh u bah K.P Pangniang napoh katei ka seng katei ka seng ka la sah khlem nongialam mynta ha KHADC hynrei ki la ong ba kin sa jied noh shen ia u nongialam jong ki hapoh KHADC.