Shillong:Ka jinghuri hura bad ka jingbym ia sngewthuh jingmut hapoh ka seng Bharatiya Janata Party(BJP) Meghalaya ka la nang heh hadien ba u nongmihkhmat jong kane ka seng u la ong ba u President jong kane ka seng na kane ka jylla, u Bah Ernest Mawrie u la shah thung kum u President da kaba shu pynbor ban thung.
Ha ka sngi saitjaiñ, u nongmihkhmat jong kane ka seng BJP na South Shillong, u Bah Sanbor Shullai u la mih pyrthei hadien ka jingsngap jar ka jong u. Dang shen u Myntri Rangbah ka jylla u, Conrad K Sangma u la kren ha ki lad pathai khubor ba ka seng BJP ka don ka jingpyrkhat ban weng noh ia u Bah Ernest Mawrie na ka kam President ba u bat hadien ba bun ki nongialam bad ki dkhot jong kane ka seng ki la iehnoh kam namar ba kim sngewtynnad ia ka jingtreikam jong u Bah Ernest kum u President ha kane ka seng.
“Nga la shah jied kum u nongmihkhmat da ki paidbah jong ka South Shillong. Hynrei ia u Bah Mawrie pat la jied kum u President jong ka seng ha ka jylla da kaba u shu ia leh jubor”, la ong u Bah Sanbor Shullai ha ki lad pathai khubor.
U Bah Sanbor Shullai u la pyni da ka jingbitar halor ka jingong jong u Bah Ernest Mawrie ba u Bah Sanbor Shullai bad u Bah AL Hek, u ba dei u nongmihkhmat na kane hi ka seng bad u ba bat ruh kum u myntri ka tnad ka koit ka khiah ha ka jylla, ba ki dei ban ai da ka jingthoh lada ki sngew ba dei ban weng noh ia u Bah Mawrie na ka kam President.
“U dei aiu ma u ban pan ia kata ka jingthoh?” la kylli u Bah Sanbor Shullai. U la ong ruh ba kaei kaei ba ong u Myntri Rangbah ka Jylla uba dei ruh u President jong ka NPP ka long kaba dei suda ba bun na ki nongialam jong kane ka seng ki kwah ban weng noh kam ia u Bah Ernest Mawrie.
“Kumba 75 haduh 80% ki nongialam jong ka seng ki la kwah ban weng kam noh ia u Bah Mawrie na ka kam President ba u bat,” la ong u Bah Sanbor Shullai.
Shuh shuh u Bah Sanbor u la ong ba naduh ba u Bah Mawrie u la bat kum u President ka seng ha ka jylla Meghalaya, bun ki nongialam jong ka seng na Ri Bhoi, na Jaintia Hills, na West Khasi Hills bad na Nongbah Shillong ki la ieh kam noh halor ka jingbym sngewtynnad ka jong ki ia ka jingtreikam ka jong u Bah Mawrie ha ka seng.
U Sanbor Shullai u la ong ruh ba ki nongialam jong ka seng na Meghalaya ki la pyntip ia kane ka jingkynrum kynram hapoh ka seng sha u National Vice President Incharge jong ka Meghalaya, u Dr M Chuba Ao.
Katkum ka jingong ka jong u, u Dr Ao u la ong ba ia kane ka jingong ban weng kam noh ia u Bah Ernest Mawrie dei ban thoh da ki jingthoh ym dei ban shu ong da ka ktien ha shwa ba un pynpaw ia kane sha ki nongialam jong ka Sorkar pdeng.
Ha ka jingkren jong u Bah Mawrie u la ong ba ka NPP kam lah ban tuklar ia ka kam ka jam kaba dei hapoh ka seng BJP, u Bah Sanbor u la ong ba u Conrad u don ka hok ban kren kumtei namar naduh kaba sdang, ki nongialam jong ka seng BJP na Sorkar pdeng ki la ong ba ka seng BJP ha Meghalaya kadei ban ai ka jingkyrshan bad ka jingiatreilang bad ka Sorkar synrop jong ka Meghalaya Democratic Alliance (MDA) hapoh ka jingialam jong u Conrad K Sangma.
U President ka BJP Meghalaya u la leh ia kaba dei ha kaba u la kynroi ia ka jing bamsap ha ka sorkar. Ka shait long hi haba phi thmu ia ka jingsynshar kaba khuid bun kin ka wang maw.