“Jied ia ka BJP, ioh da ka dud ka ngap, kiwei kin shu leit bam soh-ot sha kyndong”

Shillong:U MLA ka BJP na 19 South Shillong Constituency, u Bah Sanbor Shullai ula ai dorkhas ha u President ka BJP Megha laya u Rikman Momin ban dawa ban ai tiket MP-Lok Sabha na Shillong sha ka Dr Fenella Lyngdoh Nonglait.

U Bah Sanbor ryngkat bad katto katne ki nong ïalam ka seng ki la pynpaw ba ki ai ka jingkyrshan kaba pura ïa ka Kong Fenella Lyngdoh kum ka kyrtong ka BJP ban ïakhun ïa ka ilekshon MP Lok Sabha na Shillong Constituency.
Halor kane u Bah Sanbor ula ong ba u Bah AL Hek ym shim la pan tiket hynrei ka kyrteng ka jong u ka la shu paw tang ha ki kot khubor bad kum ki nongïalam ka seng kin ïatylli lang kawei na ka bynta ban ïatrei na ka bynta ka Kong Fenella.

U Bah Sanbor ula ong ka Kong Finela kadei ka kyrtong kaba biang tam ban ïakhun ïa ka ilekshon na ka seng BJP namar kadei ka briew kaba ki paidbah ki ithuh ithaw bha bad kadei ka briew kaba la nang la stad bha bad ka BJP ka long kaba donbok da ka jingdon ki nong ïalam kum ka Kong Fenella.
U Bah Sanbor ula kynthoh ba u Bah Pala ba ula shu lapmied ka ktha sohot baroh san snem bad ki paidbah kila babe ba kam shym la don ka roi ka san kumta u la kyntu ïa ki paidbah ba ki dei ban nang noh ha ka ban jied Nongihkhmat namar ka BJP kan dang wan ha ka bor bad lada pynjop ïa ka Kong Finela, kan wanrah ïa ka dud bad ka ngap ïa ka jylla.

“Kane kam dei ka ilekshon MLA ne MDC, hynrei kane kadei ka ilekshon MP ha Delhi kumta ki paidbah ki dei ban jied beit da ka BJP namar kan dang wan beit ha ka bor hapoh ka jingïalam u Narendra Modi,” ong u Bah Sanbor.
Ula ong ba ïa kane ka dorkhas, u President ka BJP Meghalaya un sa phah lang sha ki nongïalam ka BJP kiba kynthup ïa u Chubba Ao bad u Rituraj Sinha ban pynpaw ba ki ai jingkyrshan ïa ka Kong Finela ba kan long ka kyrtong MP jong ka seng BJP.

“Nga lah kren ïa u Bah Ernest Mawrie uba la thep kyrteng bad ngan pynsngewthuh ïa u ban weng kyrteng noh ïalade na ka jingpan tiket bad ngan leit ruh ban ïakynduh ïa u Bah AL Hek ba ngi donkam ban ïatreilang bad ïatylli lang kawei ban pynjop ïa ka kyrtong ka BJP ha ka ilekshon MP Lok Sabha,” ong u Bah Sanbor.
U Bah Sanbor ula ong, “Lada ka Kong Fenella ka jop ïa ka ilekshon MP ka long kaba thikna ba kan ïoh ïa ka Shuki Myntri Sorkar hynrei lada ki paidbah ki jied pat da kiwei, ka long kaba thikna ba kin shu bam sohot baroh 5 snem.”

U la ong ruh ba ki paidbah kimdei ban shu beij bad shong shit tang ïa ki jingrwai ilekshon ne ki khubor ba pynphriang bad pynsngewthuh bakla halor ki rukom treikam ka BJP.
“Kumba long mynta ki paidbah kiba don sha ki thaiñ nongkyndong ki la sdang sngewthuh ïa ki nongrim ka seng BJP bad ka kyrteng u Modi ka poi lut shaduh ki kyndong kynshrot,” ong Bah Sanbor.