Jew slew ba rem ka Lajong, ha ka NE United kaba la jop Final

B.M. Lanong

Kato ka North East United FC kaba jop ia ka Lajong ha madan Polo, ka ksaw phylla kumno-re, haba ka la rah syndon ia ka nam jop, da kaba pynliem kat ia ka Mohun Bagan ha ka Final ha ka sngi Saitjain, 31 August ha Calcutta.

Ka Mohun Bagan ka la tam lypa 2 goal ha ka kylla step, hynrei ka NE United ka pyniakhaid ha ka kylla miet.
Ha ka jingiashut penalty pat, ka trei ka NE United ia ka Mohun Bagan, namar u goalie ka NE United ula iada 2 tylli ki bol ba kin ym rung shapoh.
Habym jop pat te, ka dei sa tang ba iakhaid (draw) lane haba rem hi kein, kumba la long ka Shillong Lajong kaba la ialeh pyrshah ia ka North East United ha Madan Polo ha ka Sngi u Blei 26.08.24, ha kaba ka la shah thep haduh 3-0, haduh ba ka da ktah ia ki nong kyrshan kiba la tuid da ki hajar sha madan Polo bad da ki phew hajar pat sha kylleng ki shnong ki thaw, ban ia peit ha ki Pyrda Heh (Giant Screen), bym ioh tiket shuh, namar la iaid iew hana kita ki tiket ‘Black’ ruh.

Ka jingkhmih lynti ki babun hi ka long, ban rah beit ia ka Cup, haba la lah ban pynjem khnap kat ia ka East Bengal (Calcutta) ha ka Semi Final. Phewse ka la pynjew slew pynban ia ki nongkyrshan bad ia ki paidbah, haduh ba, bun kim bang-ja bang-doh shuh, katba kiba ju mad te hana ki la mad tam, ba ka la ktah palat.
Ka football hi ka syriem ia ki jingialehkai Boxing, ialympat Wrestling, Taekwondo bad kum kine kiba iatyngkhuh mar-met para briew (body contact).
Ka long kaba donkam, namarkata, ba ki nongialehkai kin long kiba biang ka rynnieng bad ka met ka phad de.

Ym lah ban len, ba kawei na ki daw ruh ba ka Lajong ka la rem ha shnong lajong bad hakmat ki nongkyrshan lajong suda, ka dei ka jingrit briew ki nongialehkai, haba iakynduh ia ka kynhun pyrshah kaba don da ki nongialehkai kiba kham heh met bad jrong rynnieng, nalor kiwei-kiwei ki daw de.
Hynrei kumno ka Lajong ka la jop pat ia ka East Bengal ha ka Semi Final, ka team Calcutta ba hakhmat, kaba don da ki nongialehkai bajrong suda? Niuma, kata ruh ka dei ka jingshisha, hynrei ym lah ban shu kyntait ia ki mat ba kdew haneng, nalor kiwei-kiwei ki daw de, kiba dei ki bynta jong ka jingialehkai, kaba hap shu pynkut da kaba ong, ka la long kumta ia ka tei ka team Mohun Bagan ruh, bad khlem artatien ka jingktah ia ka bapli ka Mohun Bagan kabym long shuh ban iakren. “yn leh kumno bym thaw jop”, kumba ju long ka rukom.

Ki por ba la leit
Malu-mala nga kynmaw ia ki katto-katne ki nongialehkai jong ki snem 60 khlieh ter-ter, kiba, nga la iohi luk-liak, kum ki jong i Bah Shering Kurbah, Bishar Thangkhiew, Patrick Syiemiong, Bah Handle Majaw, ngam pat ju iohi ia kita kiba kham jrong kum ita i Bah Tonel, Bah Justice, bad bun kiwei jong kitei ki por. Nga khlem iohi ruh ia uta u Shlur Nongbri, uba la pawnam tam napdeng ki Khasi bad uba la don hana ha kata ka list jong ka team India ruh ban ialeh Olympic.
Ban shu kdew tang katto-katne, nga la iohi pat ia i Bah Bishar Thangkhiew, iba ju ialeh na ka team Lummawbah ha kitei ki snem, i Bah Patrick Syiemiong na ka team Laban, baroh arngut ki kham duna ka rynnieng, hynrei ki tylli met ruh bad ki da tbit bha kum ki nongialehkai; ki ju shah jied ruh na ka team Shillong haba leit ialehkai shabar.

Haba ianujor lei sa ia ki madan ialehkai jong kitei ki phew snem ba la leit, yn pyniadei shuh shano bad ki madan jong kane ka juk, kiba siang da u phlang kyrpang (artificial turf), ha kaba ki madan kim don jingat-jingthem shuh kumba long ki madan ka mei mariang hyndai. Nalorkata, ki nongialehkai myndai ki pyndonkam da ka sap lajong, mynta pat ka la iaid lang sa da ki jinghikai (coaching), ha ka dur ki ‘Music Notes’ jong ki nongrwai.
Kaba hap ban ia bishar bha shuh-shuh ka long ruh, ba ki nongialehkai jong ki juk ba la leit, kim ioh ia ki jingsiew kumba ioh mynta. Lada mynsaw, sumar hi bad lut hi na lade, ka shu tyllun ha ka khem bad ka sop dawai kynbat, ym kumba long mynta.

Hynrei nga shem ba kaba kongsan tam jong ka mynnor ka long, ba ki nongialehkai ki aiti lut ia ka por ka bor bad ka mynsiem, kaba la iapher bak-lybak bad kane ka juk, kaba don artad bad ‘ki jingkhein’ ioh jingmyntoi. Niuma, kane ka la iaid ryntih hi kumta ha kane ka juk, tangba ki dei ban don pat nalade ia ka mynsiem aiti lut, haba la mih ha lympung, da kaba klet lut ia kane-katai kabym biang, hynrei thik ia ka ‘Thong’ jingkit khlieh, ban poi sha ka jop.
Ka Subroto Cup
Hapdeng ki jingjew mynsiem ia ka Durand Cup, pynkmen noh pat de ka jingjop ka Nongjri Presbyterian School, Umsning da 3 goal ia ka Major Dhynanchand, Etawah, UP, ha ka kynhun hapoh 14 snem ka ryta.
Ha ka Subroto Cup, ki don arkynhun ki skul kiba shim bynta, kawei kaba hapoh ka ryta 17 snem, kawei pat hapoh 14 snem.
Kaba la jop nyngkong eh ha ka Subruto Cup ka dei ka St. Antony’s High School, ha ka kynhun 17 snem, da shi goal pyrshah ia ka Madhynamgram High School, West Bengal. Nangta ha u snem 1999, jop sa ka Govt. Boys High School Shillong ia ka S.V. School na Calcutta, West Bengal, ha ka Tie Breaker da 6-5.
Nangta sa ka O.M.Roy Memorial High School ka la jop ia ka Magurmari High School Kokrajhar Assam ha u snem 2013, da 4 goal la 0.

Sa ka H.Elias High School ka la jop ha u snem 2019, ia ka skul KSP Dhaka kaba na Bangladesh (1-0).
Ha ka kynhun hapoh 14 snem pat, ka John Bosco Boys School Sohra, ka la jop ia ka St. Ignatius High School, Gumla na Jharkhand (1-0), ha u snem 2001.
Ha u snem 2005 pat, jop sa ka Army Public School Shillong ia ka Nobel Academy Hr. Sec. School Kathmandu, Nepal da 5-3 goal ha ka Tie-breaker.
Bad ha kane ka kynhun hi, la jop pat ka Nongjri kumba la kdew hakhmat.
(NB: U nongthoh u dei u footballer ka Malki SC ha ki snem ’70 khieh. Ula long ruh u Best Athlete ka Shillong College, uba la tam tang 2 point ia u Ihoto Sema uba na Nagaland, ha mar 4 tylli ki item ba ki lah ban shim bynta, ha madan Polo-1968; ha kaba la iarap pyniaid ruh da i Bah Micky Lyngdoh (Football Coach) bad i Bah T. Kharkongngor, baroh arngut kiba dang iadon mynta, hadien ba ki la shongthait.)