“Jaw ummat U Modi ha Parliament” 26tarik, un bam smai, kum u myntri rangbahduh

New Delhi,
20 Jymmang:
La jied mynta ka sngi, ia U  Narendra Modi, kum u nongialam jong ki MP jong ka seng BJP bad ha ka jingkren ban pdiang burom ia katei ka kam nongialam, U Modi, uba la don 63snem ka rta, ula pynsngew ia ka jingkren jong U LK Advani, ha kaba ula kynthoh, ba ula leh ia kaba dei tam, da kaba u shim ia ka kam, kum u nongialam.
Ha ka jingkren jong u, ula iam rangbah, ha kaba u ong “Ka jingshakri ia la ka jong ka kmie, ka dei ka bynta jong ka jingleh bha?”. Hynrei u ong “U khun, u dei ka kamram jongu ban shakri ia la ka jong ka kmie bad ka jingshakri kaba dei hok ruh ban leh, ia la ka jong ka seng” ong U Modi, haba kren ha ka jingialang jong ki MP, kiba dang shu shah jied thymmai ha ka Centrall Hall jong ka Parliament.
La tyrwa ia ka kyrteng jong U Modi, da U  L K Advani, ha kaba la kyrshan da U  Murli Manohar Joshi, ka Sushma Swaraj, U Arun Jaitley, U Venkaiah Naidu bad U Nitin Gadkari.
U Advani, ula ong ba U Modi, u dei u nongialam, uba khraw, uba pawnam bad u ong ba u sngew kmen shibun eh, haba u ioh ban tyrwa ia ka kyrteng jongu. U Modi, u ong ruh ba kam donkam ban don ka jingduh jingkyrmen, hynrei, ka dei ban don ka jingkhmih lynti, kaba khraw bad ka ban ialam ia kane ka ri shakhmat.
“Ngan pyrshang ban im, katba kum ka jingkhmih lynti jong ki paidbah” bad u ong ruh, ba un sei madan ia ki kam jongu, ha ka elekshon 2019 bad ula ong ruh ba kane ka dei ka sorkar, na ka bynta u duk u rangli.
“Kane ka sorkar thymmai, kan dei ka ban kit na bynta ki duk ki rangli, na bynta ki klur ki khun samla bad ki kmie bad ki samla kynthei, kiba don ha ki nongkyndong, kiba la shah iehnoh bein” ula ong.
Katei ka jingleit kaba mynta, ka dei ruh ha ka sien kaba nyngkong ia u myntri rangbah ka Gujarat, ba un leit rung ha ka Central Hall jong ka Parliament.
Hadien jong katei ka jingialang, U Narendra Modi, ha ryngkat bad U President jong katei ka seng, U Rajnath Singh, ki la leit iakynduh ia U President ka Ri, U Pranab Mukherjee, ha ryngkat bad ki shithi jingkyrshan jong kiwei de ki seng sain pyrthei, kiba dei na ka kynhun NDA. La iathuh ba ki don shiphew tylli ki shithi, ba la kyrshan da ki seng, kiba don lang ha ka kynhun NDA bad kiba kynthup ia 335ngut baroh ki MP.
La iathuh ruh da U Rajnath Singh, ba ka jingpynsmai ia u myntri rangbahduh, kan long ha ka 26tarik Jymmang 2014, ha kaba la antad, ba yn khot sngewbha ia 3hajar ngut ki briew, ba kin wan ban sakhi, ia katei ka sngi kaba khraw. Mynta ka sngi, U President, ula pynkup bor ruh ia U Modi, ba un shim ia ka shuki myntri rangbahduh, wat la ka jingpynbamsmai kan long ha katei ka sngi, ba la buh, ha ka por 5baje janmiet ha Rashtrapati Bhavan, ha New Delhi.