Jaw ummat u kyrtong ka UDP Nongpoh, ba u la lah ban pynurlong ia ki jingangnud u Dr. DD Lapang

Nongpoh: Ki paibbah na ki shnong bapher bapher hapoh ka Nongpoh Constituency, mynta ka sngi ki la mih shakhmat ban shimbynta ha ka jingiaid paidbah ka Party UDP, kaba dei ruh ka jingiaid paidbah na ka bynta ban kyrshan ia u Mayralborn Syiem, Kyrtong ka UDP na Nongpoh Constituency.

Lyngba katei ka jingiaid paidbah jong ka UDP, kaba ki la sdang na Nongpoh sha 20mer, da kaba phai biang sha Nongpoh bad pynkut sha Umden, la ioh ba ki la don da ki hajar ngut ki paidbah ki leit ban shimbynta ia katei ka jingiaid paidbah bad ruh ha ka jingialang kaba la long ha Umden, kata na ka bynta ban ai ka jingkyrshan kaba pura ia u kyrtong ka UDP na Nongpoh Constituency.

Haba la pynkut ia katei ka jingiaiaid paidbah bad pynlong ia ka jingialang ha madan Umden, u Bah Mayralborn Syiem, haba ai jingkren ha katei ka sngi, u la ai ka jingkhublei kaba kyrpang eh ia ki paitbah, kiba la iawan ban ban ai jingkyrshan ia u kum u kyrtong ka UDP na Nongpoh.

Ha ki jingkren hakhmat ki paidbah, u Bah Mayralborn Syiem, u la pynpaw ba kum u nongmihkhmat shibun ki jingeh kiba u ia kynduh ha ka jingiaid lynti kum u nongmihkhmat na Nongpoh bad kaei kaba u la sngewsih eh, ka dei hadien ba u la shem bad mad, ba ki la don ki briew, kiba la khanglad wat ia ka hok ne ka jingmyntoi ki paidbah, kata ka dei halor ka surok na Nongpoh-Umden sha Sunapur, ka surok kaba la dep ban ioh ia ka jingpynmang tyngka naduh u snem 2022, hynrei tang namar ba la don kiba khanglad, kaba la pynlong ia katei ka surok ba ka shu sahkut bad khlem trei haduh mynta.

Hynrei ha kawei pat ka liang, u Bah Mayrald u la pynpaw ia ka jingkmen kaba khraw, hadien ba u la lah ban pynurlong ia ka Northern Ri Bhoi College, kaba dei ka jingangnud kaba khraw eh jong u Dr. D.D Lapang bad haba u kynmaw ia katei ka College, ula jaw ummat brup, namar ba u la mad ia shibun ki jingeh halor katei ka College.

Kiba la donlang ha katei ka sngi jong katei ka jingialang paidbah ka UDP, ki kynthup ia u Bah Balajied Rani, MDC Nongpoh, u Bah Donbok Khymdeit, President UDP Ri Bhoi, u Bah Dipul Ryntathiang, President UDP Umsning lem bad shibun kiwei pat.