Shillong, 17 Naiwieng:
Ki longkmie ryngkat ka bah khun rit bad ki rangbah ba shah pynpra ia la ki iing na shnong Umawli, Mawtari -Mawlong ki la pdiang burom hynnin ka sngi, ia ka president ka Civil Society Women’s Organisation (CSWO), Kong Agnes Kharshiing ha kane ka sngi Saitjain hadien ba la ioh jamin na ka Kashari.
Ka Kong Agnes ka la shah set phatok la shi taiew ei ei hadien ba ka la shah ujor FIR ha ka MUDA.
La pynlait phatok ia ka kong Agnes ryngkat lai tylli ki kyndon bad kita ki long ban nym pynthut ne pynsniew ia ki sakhi, ban nym byrngem ia kiba ujor bad kiba sakhi bad ban nym phet rieh.
Ka Kong Agnes ka la ioh jamin na ka ïingbishar (Deputy Commissioner Judicial) ha ka sngi Thohdieng bad hap ban siew T. 20,000 sha ka Sorkar.
Ka Kong Agnes kam lah khlem da jaw ummat haba ka iohi ia ki longkmie kiba dang bah ia ki khun dang riewblei shadien na ka bynta ban pdiang burom ia ka.
“Kine ki khyllung kin sa long ki nongialam jong ngi ha kawei ka sngi,” la ong ka Kong Agnes ryngkat ka dang kdup ieid bad doh ia kine ki khunlung bad iakhublei kti bad ki longkmie bad kiwei pat kiba iadon lang kynthup ia u khun jong ka, u Bah C Kharshiing, ka nongiasaid aiñ Poonam Yadav, ki dkhot ka CSWO, ka Kong Angela Rangad bad kiwei kiwei kiba iajan bad iaieid bad ka kong Agnes.
Mar iamih ka Kong Agnes na khyrdopbah jong ka phatok, ki longkmie ki iatur puk ban kdup ieid ia ka ryngkat ka jingpyndeng bad ai syntiew kum ka dak ka jingpdiang burom bad jingpyneh daw ia ka hadien ba la lait noh na phatok hadien ba ka la sah kumba khyndai sngi naduh 8 tarik.
Ki dkhot jong ka CSWO ki bret ruh ia ki syntiew lyngkhot babun rong sha ka Kong Agnes bad sha ki paidbah ba ialum ban ioh iapajut kti bad ka.
Hadien ka jingiakhublei, ki paidbah ki la synran ia ka Kong Anges shaduh sha ïing jong ka ha Bymfyle Road harum Shillong College.
Ki nongshong shnong ba la shah pynpra noh ki ïing jong ki, ki la pynpaw ka jingkmen halor ka jingioh jamin ka Kong Agnes.
“Ka Sorkar ka kynnoh ia nga ba nga la leh bakla. Hynrei nga khlem leh kano kano kaba bakla bad ngan iakhun beit ia ka hok lajong,” la ong ka kong Agnes.
Ka la ong ba kiba dei hok ki trai jaka, ki dei ban ioh biang ia ka jaka jong ki, ngin iakhun beit bad ki bad ngan nym kynran dien wat lada nga shah kem shi hajar sien.
Ka kong Agnes ka la shah kem ha ka 8 tarik halor ka jingkynnoh ba ka la khang lad ia ka briew jong ka MUDA ban pynpra ia ki ïing ba shna beaiñ ha Umsawli bad Mawlong- Mawtari.
San tylli ki ïing ba sah briew, ar tylli ki dukan sha bad ar tylli ki sem masi thylli bad 4 tylli ki ïing trep, la pynpra ha katei ka sngi.
Phi don ban ong eiei?