Jan lut ka doh kyndang, ym pat ioh ka UDP Ngi don ka bhah 4 ngut ban long EM:T.Dkhar

Shillong, 3lber:
Lai tylli ki kam kiba kham heh ka ARPA ka kynhun synrop ki lai seng ka la dep ban pynbna , ka kam CEM sha u bah Ardent Basaiawmoit ka HSPDP, chairman ka kong Teilinia Thangkhiew ka HSPDP bad ka kam De puty chairman uwei na ki MDC ka KHNAM, ym pat shym iohi ba ka UDP kan don ha khmat.
Hadien ba la wai ka jingialang jong ki lai seng mynta ka sngi, u Rupang u la ioh ban ia kren bad u Bah Teinwell Dkhar u MDC ba la rangbah bha ka UDP ha KHADC haba khein na baroh ki MDC ka UDP ha kane ka sien kaba mynta. Ha ka jingiakren la kylli na u bah Teinwell ba hadien ba la iohi ba ka UDP kam pat ioh bhah ha ki kyrdan ba kham ha khmat wat hadien ki lai tylli ki kyrdan ba ka ARPA ka la pynbna, ka don ne-em ka jingsngew rem kaba lah ban pynmih ka jingiapra hapdeng kitei ki lai seng namarba haba phai sha ka jingbun paid ka UDP ka wan ha ka kyrdan kaba ar napdeng ki seng riewlum bad ka la ioh 6 ngut ki MDC hadien ka HSPDP kaba don 7 ngut, u bah Teinwell u la ong ba ka UDP kan iaineh kumba la ia kren sngewthuh ha ka ba sdang. Ha ka juh ka por, u la ong ba ka seng ka don ia ka bhah ban ioh 4 ngut ki EM kumba la ia kren pynbeit ha kaba kam banse ban pynduh EM noh ia 2 ngut ki MDC jong ka. U bah Tein u la ong ruh ba ka HSPDP ruh ka don ia ka juh ka bhah ban don 4 ngut ki EM bad ka KHNAM pat 3 ngut ki EM ha kaba ka ruh kam banse ban pynshong noh sharud ia uwei na ki MDC jong ka. “Ngin iaineh kumba la iakren sngewthuh, ngi don ruh ia ka bhah 4 ngut ban long EM” kren pynkut u bah Teinwell Dkhar.
Kum ban shu pynkynmaw ba ka UDP ka dei ka seng riewlum kaba la ia trei synrop lang bad ka seng Congress ha kitei ki san snem ba la dep naduh ba sdang u snem haduh ban da kut ka samoi ki MDC, bad ha katei ka jingiatreilang ka UDP ka la ioh bat ia ka kam Deputy CEM kaba la bat da u bah Remington Pyngrope MDC barim ka Mawkynrew katba ki lai tylli pat ki kam ba kynthup ia u Chairman, Deputy Chairman bad u CEM la bat da ka seng Congress.
Lah ban kdew nalor ki lai tylli ki kam kiba ka ARPA ka la bhah kam lypa ka kam Chairman, CEM, Deputy chairman, ka dang don pat sa ka kam Deputy CEM kaba haduh mynta ym pat shym la pynshai shano katei ka kam kan leit, hynrei la sngewthuh shai ba ka UDP ka don ka khmih lynti ban bat ia katei ka kam.