Jan 20 ngut ki MLA ban iasoh bad ka BJP, bun na Congress

Shillong, 08 Naiwieng:
Lada kam long da kumwei pat, ka party Congress kan sa rit iar shwa ban poi ka elekshon 2018 namar ba kiba bun ki MLA jongka, ki lah ban leit phet noh sha ka BJP.
Ha ka jingtwad jingmut na u President ka BJP, Bah Shibun Lyngdoh mynta ka sngi, u la kubur ba ki don bun bah ki MLA khambun eh kiba dei na ka Congress kiba ka pynpaw ba ki la pynkhreh lypa ban iasoh bad ka BJP ynda la dei ka por shwa u 2018.
“Ki la don kumba 20 ngut ki MLA kiba khambun na ka party Congress, bad katto katne nalor ki MLA shimet, kiba la phah ia ka jingkwah jongki ban iasoh bad ka BJP”, la ong u Bah Shibun.
U la ong ba kito ki MLA shimet kiba don ha kane ka sorkar MUA-II kim pat kwah ban mih mynta na ka sorkar ban iasoh noh bad ka BJP namar ba ki dang ap ban ioh skhim ban theh sha u paidbah namar ba lada kin mih, kin sa duh noh ia ki skhim na ka sorkar.
“Ki MLA shimet kim pat kwah ban iasoh mynta namar ba ki dang ap ban ioh skhim na ka sorkar namar ba lada kin mih noh, kin sa duh noh ia ki skhim”, la ong u Bah Shibun.
Hynrei u president ka BJP um pat kwah ban sei madan ia ki kyrteng jong ki MLA kiba kwah ban iasoh BJP namar ba ioh kan thut noh pynban namar ba mynta dang don sa kumba shi snem eiei ka por ban kut ka jinglong MLA jongki.
“Ka jingkhang ka BJP ka plie beit iano iano kiba kwah ban wan iasoh. Ngi kham sngew ioh bor lada don lei lei kiba la long MLA ban wan sha ka party”, la bynrap u Bah Shibun.
Katkum ka jingong u President ka BJP ka jingiakren bad kine ki MLA ka dang iaid shaid shaid mynta bad ka BJP bad kin sa ap sa tang ia ka por ba kin sa pynpaw pyrthei.