Jakhom ki paidbah ba thut ka rukom shna ia surok Mairang-Patharkhmah

Shillong, 15 Naiwieng:
Ki paidbah ka thain Ri Bhoi Sepngi ki sngew jakhom khait namar ka jingsniew palat ka surok Mairang-Patharkhmah kaba dang shna mynta.
Hynrei ka jingeh jongki kaba kham sngew ngiah, ka long ba don ki kontraktor kiba shna hynrei ki la sangeh noh tip naei ka daw.
Ki kali rit kiba iaid lyngba katei ka surok teng ki sahkut noh ha lynti na ka jinglong ktieh bad thliew ka surok bad ka shim por ban iaid bun kynta ban poi sha Nongkhlaw-Mairang.
U Bah Najim Kharmalki, Vice Chairman ka Western Ri Bhoi Development Council (WRBDC) ula ong, ba katei ka surok la sdang ban pyntrei naduh u snem ba ladep hynrei mynta la jan shisnem ki kontractor ki la sangeh noh.
“Kane ka long dawbah kaba la pynjakhom ia ki paidbah nongleit nongwan khamtam haba don ba pang ba shitom ban leit shim dawai ne shah sumar sha ki hospital,” ula ong.
Ki paidbah ki dap da ka jingkmen ban iohi ba ka tnad PWD ka la shimkhia ban pyntrei ia katei ka surok ban pynheh ban suk ka leit ka wan, kaba pyniasoh ia ka West Khasi Hills bad ka Ri Bhoi District shaduh Azara, Assam.
Ka jingkmih lynti ki paidbah ka long da khongpong bad ki hab ban mad ia ki jingeh ha ka kit ka bah, tang namar ka jingleh sting ki kontractor bad ka tnad PWD ban pyndep kloi kaba ka ktah ia ki paidbah.
Ki don ki kontractor kiba sdang ia ka jingtrei ha kajuh ka por bad ki la lah ban pyndep ha ka por ba biang kum ha Jirang, ka la iarap shibun nongleit nongwan sha Assam, hynrei ki kontractor kiba pyntrei naduh Patharkmah shaduh Nongkhlaw ki la sangeh, ong u bah Najim bad kyntu ia ka tnad PWD ba kan shimkhia ban pyndep kloi ia kane ka surok kaba long u budlum ia ka thain Ri Bhoi Sepngi.