Nongpoh:Ka Ringkom uni Marak, kawei na ki nongialam ba paw hapdeng ka jaidbyn riew Garo ha ka thain Umtyrnga, ka la pyn rem jur halor ka jingleh da ki trai par maw kiba kynthup ia u Ajay Lama bad u Commission Khyriem, kiba la shu ieh jyndat khlem da iarap ei ei ia ki katto katne ngut ki nongtrei hapoh ki par maw jong ki bad kiba la mynsaw na ka jingjia bthei maw ha ka par maw u Ajay Lama, kaba la wanrah ia ka jingiap briew bad mynsaw ia kiba bun ngut.
Lah ruh ban kdew hangne, ba katei ka jingjia bthei kaba shyrkhei ka la jia ha ka 27 tarik u bnai ba la dep, ha kaba ar ngut ki mynsiem briew ki la duh ei bad kumba 10 ngut ki nongtrei bylla ki la mynsaw ha katei ka jingjia, hynrei haduh mynta la kynnoh ba ki trai jong kitei ki par maw kim pat lah ban iarap ban dawai kaba long kum ka bai sumar ia ki katto katne ngut kiba la ngat ha katei ka apot.
Haba iadei bad katei ka jingjia, kawei na ki kynhun seng na Ri Bhoi (MPSO) ka la ujor da ka ejahar ha Pillangkata Police Outpost bad haba shimkhia halor katei ka ejahar, ki Pulit ki la pynngat ha ki kyndon ain pyrshah ia ki trai jong kitei ki par maw, ia kaba ki la shah pynngat ha ki kyndon ain katkum ka Khanapara PS C/No-24 (9) 21 U/s 188/304 A/337/427, 34 IPC hapoh ka R/W section-(a) jong ka Explosive Substance Act. Hynrei la ong ba ki pulit kim lah ban kem ia ki trai jong kitei ki par maw, namar ba ki la dep ban ioh lypa ia ka Anticipatory Bail ha shwa ba ki pulit kin kem ia ki.
Dei halor kitei ki nongrim ba kiba la mynsaw na katei ka jingjia kim pat ioh ei ei ka jingiarap, ka Ringkomuni Marak, ka la byrthen ba lada ki trai jong ki par maw kim wan mih ban ai jingiarap ia ki nongtrei bylla kiba la mynsaw ha katei ka jingjia, na ka liang ka kynhun jong ka jaidbynriew Garo kim banse ban shim pat da ki lad ba tyngeh.
Phi don ban ong eiei?