Jah rngai uwei na ki 300 ngut, na ka jingjia pluh ding ka karkhana ha 15mer

Nongpoh:La 10 sngi kynthih ba kawei ka Karkhana shna plastik kaba la tip kum ka Shiv Polymer Factory kaba don ha 15mer (Assam Side), ka la kem ding bad kaba la bam duh ia baroh ki jingdon jingeh hapoh katei ka Karkhana, hynrei mynta la ioh jingtip pat, ba la don uwei na ki nongtrei uba trei hapoh katei ka Karkhana, u la jah rngai bad kat haduh mynta ym pat tip satia ba u don shaei.

Ha katei ka Karkhana, kaba la pluh mynta ka miet 22 tarik u Iaiong, la ong ba ki don kumba 300 ngut ei ei ki nongtrei, ha kaba na kitei ki 300 ngut baroh ki la lait phet ha katei ka por ba pluh kynsan katei ka Karkhana, hynrei tang utei uwei u nongtrei ia kaba la tip kyrteng kum u Rahul Mandal, u la jah naduh katei ka miet ba la jia ha katei ka jingpluh hapoh katei ka Karkhana.

U Pankaj Mandal, uba dei u hymmen jong u Rahul Mandal, u la iathuh ba utei u para jong u, tang mar ia jia katei ka jingpluh ding hapoh katei ka Karkhana, u la pyntip sha u kpa da kaba phun bad ha ka jingiakren, u kpa u la btah ia u Rahul ba u dei ban mih noh ha katei ka jaka, khnang ban lait na ki jingmynsaw, hynrei tang katto katne por ba kiba haiing ki la pyrshang ban phun biang ia u, la pynpaw pynban ba ka phun jong u ka la Switch Off bad kaba la pynsngewsih eh ia ka iing ka sem hi baroh kawei.

Haba iadei bad ka jingjah klep jong u Rahul, kiba haiing jong u, ki la pyntip sha ki Pulit ka Sonapur Police Station, khnang ba kin iarap ha ka ban wad lem ia u Rahul Mandal, uba la jah kynsan naduh katei ka miet ba la jia katei ka jingjia pluhding ha katei ka Karkhana kaba don ha 15mer.