Jah rngai u transformer ka MeECL na Umsur

Shillong, 19 Rymphang:
U Rangbahshnong jong ka shnongUmsur kaba hap hapoh jong ka South West Khasi Hills District, u Bah Nasar Marwein u la iathuh ba u Tranformer jong ka tnad MeECL u la jah na ka jaka kaba ju buh ban sam ding eletrik ka shnong ha ka 18 tarik mynta u bnai, ha kaba kum ka shnong kam don jingtip eiei.
Haba kren sha ki lad khubor u Bah Marwein u la ong ba kum ka shnong kan ujor sha ki pulit ban thwet ia ki briew kiba don kti ha kaba tuh ia u transformer na katei ka shnong. Kane ka jing jah kyndit jong u Transformer na ka jaka kaba ju buh ka la pynkyndit ia ki nongpyniaidshnong.
La iathuh ba ia kane ka jingjia kum ka shnong kala pyntip sha ki bor ba dei peit ia ki kam bor ding kiba hap hapoh katei ka thain. U Bah Marwein u la ong ba lada ki bor ba dei peit ia kane ka kam ki wan ban shim noh ruh ki la dei ban kynjoh ktien sha ki bor shnong, hynrei ban shu jah kynsan na kaliang jong ka shnong ruh ka don ha ka umdum.
U Bah Marwein u la iathuh ba kane ka dei ka sien kaba nyngkong ba u Tranformer  un shu jahklep na ka jaka kaba u juh don man ka sngi. Na ka liang jong ka shnong lyngba ka FIR kaba ki la ai ka kwah ba ki bor ba dei peit bad ki pulit kin thwet ia ki briew kiba don kti ha kane ka kamtuh namar kum ka shnong ka sngewkhia jur halor jong kane ka jingjahjong u Tranformer.