![](https://www.urupang.com/wp-content/uploads/2023/01/DSC00677-5.jpg)
Shillong: Ka jingpluh ding ha Mawprem dong Mawbah hynnin ka sngi ha ka 10 tarik u kyllalyngkot 2023, ha kaba ka iing kaba la pluh ka dei kaba don kumba 5 kynrad bad 3 iing ki ba dei trei shabar bad 2 iing kiba dangsah wai ha kane ka iing.
![](https://www.urupang.com/wp-content/uploads/2023/01/DSC00678-7.jpg)
Haduh mynta khlem pat ioh jingtip ei ei ba la don ne em ki nongsah wai hapoh kane ka iing kiba la iap bad mynsaw, hynrei la ioh jingtip ba arngut ki khynnah ba dang jah rngai iwei i khynnah kynthei, ba dang 5 snem karta bad iwei pat i shynrang ba dang 3 snem karta.
La ioh jingtip ruh ba ka kmie jong kine ki arngut ki khyllung, la rah ban shah sumar noh ha hospital na ka daw ka jingshitom iapler.
Ha ka jingiakren bad ki nongthoh khubor na ka liang u bah David Syiemlieh Rangbah Shnong ka Mawprem Mawbah, u la ong ba kumba 6 baje ei ei kane ka jingjia ka la jia bad haduh kumba 4 tylli ki tyndong lyer shet ki la bthei noh. Shi bynta ruh ka dei ka jingkloi jong ki kali pynlip ding ban pynlip ia ka ding ka ba klang bad lada jia ba ki kali pynlip ding ki slem ban wan ym lah ban tip shuh ka ei ka ban jia ia katei ka iing la bynrap u Rangbah Shnong. U la ong ruh ba haduh mynta ym pat tip ba kaei ka daw ba pynlong ia kane ka iing ban bthei bad pluh kynsan.
Na ka liang u Rangbah shnong bad Secretary shnong ka Mawprem, ki la ong ba ka sorkar kan peit lem ban shna kham heh ia ki surok ha kine ki jaka, namar ka surok, ka long kaba khim bad ki kali ki ba heh kim lah ban rung sha duh shapoh shnong namar la khim lut. Ka sorkar kadei ban pyndonkam ruh da ki kali rit ban pynlip ding namar ha Kane ka ja ka ba pluh lada dei ki kali rit ka dang lah ban rung ban pynlip kham kloi shuh shuh ban kan ym jia kano kano ka ba sngewsih la bynrap u bah Eris thabah secretary ka shnong Mawprem.
Kane ka jingjia kam dei shuh ka jingjia kaba nyngkong, hynrei ka jingpluh iing ha kine ki thaiñ ka long na ka por sha ka por, la bynrap u bah Eris Thabah.
Phi don ban ong eiei?