Jah rngai 300ngut ki nongshong liengsuin, kiba dei ban test corona ha Silchar

Ki bor distrik ha Silchar, ki don ha ka jing kulmar jingmut kaba khraw bad ka daw, ka long ba haduh 300ngut ki nongleit jingleit, kiba wan da ka liengsuin, kiba hiar ha Silchar, ki la jah rngai, naduh ka sngi balang bad kumta ki bor distrik, ki khlem ioh satia ban test la ki don jingpang corona ne em.

Ka ain jong ka sorkar Assam, ka long ba kito kiba wan na shabar, k dei ban pyndep da kaba leh test ialade, da ka Rapid Antigen Test (RAT) bad ka RT-PCR bad ia kitei la leit ialam ha ka Tikol model hospital, kaba don marjan na katei ka kad liengsuin hi.

Ha ka sngi balang, ki don 690 ngut kiba hiar ha Silchar, ong U ADC ka Silchar, U Sumit Sattawan bad 189ngut ki la pyndep ia ka test bad na kitei, la lap ba ki don 6 ngut kiba don ia ka corona, katba 300ngut ki la shu jah rngai na ka kad liengsuin. Haduh mynta, ki bor distrik, ki dang wad jingtip ia kitei ki briew bad kim tip satia, la ki la poi shaei ruh.