Jah kyrteng bah Shylla, Arbinus na UDP, u James na ka KHNAM

Shillong,19 Jylliew:
2 ngut ki MDC ka UDP u bah H.S Shylla na Nongkrem bad u bah Arbinus na Umroi kim shym la don ha ka thup jong ki MDC ka UDP kiba la mih noh na ka People’s Democratic Forum (PDF). U nongialam ki MDC ka UDP ha KHADC u bah Teinwell Dkhar u la ong ba haduh mynta ki MDC ka UDP kiba ia tylli mlon ki don 4 ngut kata kong Rona Khymdeit, Donkupar Sumer, Equator Nongrang bad ma u (Teinwell). Ia kitei ki 4 ngut ka UDP ka la ieh ha ka rai jong ki la kin wan sha ka Party ne kin iaid la ka jong ka lynti.
U MDC ka KHNAM Mawkhar ruh u bah James Ban Basaiawmoit um shym la don ha ka thup jong ka KHNAM. U bah Pyndap Saibon President rangbah ka KHNAM u la ong ba u bah James Ban um shym la poi ha ka jingialang CEC ym tang mynta ka sngi hynrei ki la don bun tylli ki jingialang jong ka KHNAM, “Ngi la shim ia ka rai ban weng noh na ka PDF, ngi ieh ha ka rai jong u la un bud ia ka Party ne un iaid la ka jong ka lynti” ong u bah Pyndap Saibon.
Katkum ka jingkren u bah Pyndap la sngewthuh ba lada u MDC ka KHNAM u ia leh pyrshah ia ka rai jong ka seng khlem pep un shah beh seng beit. “Ngin sa ia peit hadien lada jia ba u ia leh pyrshah” u la ong.