Jah klep T.23 lak, ka jingsiew bai jaka ka KHADC na ka NHAI

Shillong, 18 Risaw:
Ki tyllong khubor kiba u nongthohkhubor u la ioh lum la iathuh ba ka pisa ka KHADC kaba haduh T.23 lak, ka la shu jah klep khlem paw jingkheiñ ha ka account jong ka Council. Katei ka dei ka pisa ba ka KHADC ka la ioh kum ka bai lutksan namar ka jingshim jaka ka National Highway Authority of India ( NHAI) ban pynheh surok ha iew Byrnihat.
Katkum ka jingtip ba la iohlum la ong ba ia katei ka pisa ka NHAI ka la dep siew lyngba ka ophis u Deputy Commissioner bad la ong ba ka KHADC ka la dep shim ia ka pisa hynrei kam paw pat ha ka account jong ka Council. Katkum ka jingtip ba la ioh lum la ong ba katei ka kam ka dei ha u snem 2013.
Shuh shuh la iathuh ba kam shym la paw jingkheiñ satia katno ka KHADC ka ioh bailutksan ia ka jingshim jaka jong ka NHAI ban pynheh surok ha kaba ka la shim noh ia ka ophis jong ka tnad forest kaba don ha Jorabad ha u snem 2013 bad mynta ia katei ka ophis la pynkynriah noh sha 14 mer-Ri-Bhoi District. U nongthohkhubor u dang pyrshang ban lum jingtip katno ka bai lutksan na bynta katei ka jaka.