Ha ka Common Platform ne ka Rynsan Iatai, kaba la pynlong da ka Synjuk ki San Shnong bad kaba ki la pynlong ha Madan ialehkai ka shnong Liarsluid, lai ngut ki kyrtong kiba la mihkhmat ban aireng ha kane ka Ilekshon MDC na Umroi Constituency, kiba kynthup ia u kyrtong ka VPP, UDP bad Congress, ki khlem poi satia ha katei ka Rynsan Iatai, hynrei kiba la poi dei tang u Bah George B. Lyngdoh, kyrtong Shimet bad u Bah Rangkynsai Kharbuki kyrtong ka NPP.
Ki shnong kiba la pynlong ia katei ka Common Platform, ki kynthup ia ka shnong Mynri Umsning, Madan Rtiang, Liarsluid, Khweng bad Itsohpa-ir, ha kaba ka jingthmu jong ki nongialam shnong lem bad ki paidbah na kitei ki 5 shnong ban pynlong ia katei ka Rynsan Iatai, ka long ban tip bad ban iohsngew ia ki nia ki jutang jong ki kyrtong MDC, ki ban sa aireng na Umroi Constituency.
Kum ban shu kdew hangne, ha kane ka Ilekshon sha ka Iingdorbar ka Khasi Hills Autonomous District Council (KHADC), ki don 5 ngut ki kyrtong kiba la mih shakhmat ban iakhun na Umroi Constituency, kita ki kynthup ia u Bah M.D Syiem na ka Congress, u Bah Isynei Hinge na ka VPP, ka Samla Naphishisha Marwein na ka UDP, u Bah Rangkynsai Kharbuki na ka NPP bad u Bah George B. Lyngdoh kum u kyrtong shimet.
Kaba kham sngewlyngoh ka long, ba ha katei Rynsan iatai kaba la pynlong da ka Synjuk ki 5 Shnong, dei tang u Bah George B. Lyngdoh bad u Bah Rangkynsai Kharbuki, kiba la nud ban leit iashimbynta ha katei ka Rynsan Iatai, katba kitei ki 3 ngut pat ki kyrtong ym shym la iohi durkhmat ha katei ka Rynsan Iatai.
Katei ka Rynsan Iatai, ka dei kaba la sdang naduh ka por 11 baje mynstep bad kaba kut ha ka por 12:30 shiteng sngi, ha kaba la sdang ia ka jingialang da ka jingkren jong ki briew kiba pyniaid ia katei ka Rynsan Iatai, hadien kata pat sa ka jingkren jong u Bah George B. Lyngdoh bad u Rangkynsai Kharbuki.
Hadien ba la kut ka jingkren, u Bah Rangkynsai Kharbuki u la mih noh na katei ka jingialang, hynrei u bah George B. Lyngdoh, uba la ap haduh ba kut katei ka por ba la buh bad nalorkata kiba bun ki jingkylli kiba iadei ban jubab da u Bah Kharbuki, ki paidbah kim ioh shuh, namar ba u la mih noh shwa ban kut katei ka Rynsan Iatai, da kaba u aidaw ba u la don jingialang shawei pat ki jaka ba la pynbeit bad kiwei pat ki briew.
Kumta haba u MDC Umroi bad uba long ruh mynta kum u kyrtong ka NPP u la mih noh ha katei ka jaka, ki paidbah ki la shu pynkut noh ia ka jingialang, da kaba buh shibun ki jingkylli ia u Bah George B. Lyngdoh, ba kaei na u leh lada un jop na Umroi, na bynta ban mihkhmat sha KHADC, ha kaba u Bah George B. Lyngdoh, u la jubab lut ia baroh ki jingkylli, kaba la buh da ki paidbah.
Phi don ban ong eiei?