Jah ka liengsuin bad 116 ngut

Algiers, 24 Naitung:
Kawei ka liengsuin na Algeria ka Air Algerie, kaba la jah lynti naduhx ka jaka ba ka mih na Burkina Faso ban leit sha Algiers , la ngeit ba ka bthei ha suin, ong ki bor pyniaid liengsuin katei ka Ri haba kren sha kawei na ki lad pathai khubor. “Nga pynshisha ba ka la bthei” ong uwei na ki nongpyniaid u bym shym la treh ban iathuh bniah haei katei ka lieng suin ka don bad kaei ka daw ba ka la jia katei ka jingjia.Hapoh katei ka liengsuin kaba dang leit lynti na Ouagadougou, Burkina Faso sha Algiers ki la don haduh 116 ngut ki briew , kiba kynthup ia 110 ngut ki nongleit nongwan bad 6 ngut ki nongtrei katei ka liengsuin. Na kitei ki 116 ngut kumba mar shiteng na kitei ki briew ki dei ki nong France, iathuh shuh shu ki lad khubor.
Kham mynshuwa, u myntri ka tnad Transport ha Burkino Faso u Jean Bertin Ouedrago u la iathuh ba la phah ia katei ka liengsuin ba kan pynphai sha kawei pat ka lynti iaid jong ka namarba ka don ka jingkhie eriong kaba jur ha ka lynti ba ka thmu ban leit, bad la pyntip ha ka por 0138GMT, ong uwei na ophisar.
Ar tylli na ki jet ia khun ka France kiba don ha katei ka jaka ki la her sha kylleng ki bynta jong katei ka jaka ban wad ia katei ka liengsuin ba la jah, katkum ka jingiathuh uwei na ki heh shipai ka France u la ong ba ki bor pahara ka Nigeria ki la iohi ba ki la don ki liengsuin kiba la iaid lyngba ki khappud jong ka Mali ban wad ia katei ka liengsuin ba jah. La iathuh ruh ba ki bor jong ka APS ki la duh ia ka Siknal jong ka AH 5017 shi kynta hadien ba ka mih na ka jaka ba ka la kiew suin.
Ki bor pyniaid jong ka Air Algerie haba ia kren bad ki lad khubor mynta ka sngi ki la iathuh ba ki briew kiba don hapoh katei ka liengsuin ki dei kiba thmu ban leit na kawei ka jaka sha kawei pat kum na Europe, Middle East ne na Canada. Ki bor pyniaid ki la kam ruh ba kitei ki ba don hapoh katei ka liengsuin ki kynthup ia 50 ngut ki nong France, 24 ngut ki Burkinabe, 8 ngut ki Lebanese, 4 ngut ki nogn Algeria, 2 na Luxembourg, 1 na Belgium, Switzerland, Nigeria, Cameroon, Ukraine, bad na Romania. Katba ki bor jong ka Lebanese ki la kam ba la kumno kumno ruh ki la don haduh 10 ngut na katei ka jaitbynriew. Ki 6 ngut pat ki nongtrei hapoh katei ka liengsuin kaba la jah rngai ki dei baroh ki nong Spain.