Jah ka file na ophis ka KHADC, halor ka thied jaka ha Mawkyrwat, ong u CEM

Shillong:U CEM ka KHADC u Bah Titosstarwel Chyne u la ïathuh ba ka kam ban shimti ïa ka jaka ha Mawkyrwat la shim khia da ka Council bad ïa katei u la jubab ïa ka jingkylli u MDC ka Mawkyrwat u Bah Carnes Sohshang.

Utei u MDC ka Mawkyrwat u la pyn paw ruh ka jing lyn ngoh ban pyntip ba ka la don kawei ka jaka ba la dep thied da ka KHADC naduh u snem 2014 ha kaba ka sales deeds bad ki kot ki sla ba la ïasoi hapdeng ka KHADC bad ki trai jaka, bad ki bor shnong kiba ka KHADC haduh mynta kam pat shym la kam trai satia.

Haba wanrah ïa katei ka mat hapoh sngi kut ka Dorbar Lyïur ka KHADC u Bah Sohshang u la ong ba ïa ka sales deeds la dep ha u 2015 bad balei la slem kam trai.
“Ka dor ba la thied ka KHADC ha katei ka snem ka long T. 35,25,39 lak kaba dei ka dor khyndew bad lano kan leit kam trai. Ka jingheh ka jaka ka long 11,750, 13 square feet ne 192 Square metre bad lano yn pyndep ïa ka land records,” ong u Bah Sohshang.

U la ong ba namar ba la don ki kot ki sla dei ban leit kam trai noh ban leh ka land records, ïa ka gift dees ban ai sha ki trai jaka naba katei ka jaka ka don ha Mawkyrwat kaba don hajrong bad jan ki ophis sorkar kumta dei shna noh da kaei kaei ban ïoh aiwai namar kadei hakhmat surok bad dei ban ker ne fencing khnang ban lait ka kyntur pud ki briew.

Haba ïoh jingtip ba ka KHADC kam don jingtip halor katei, u MDC ka Mawkyrwat bad u MDC ka Mawkhar Pynthorumkhrah Bah PN Syiem ki la pynpaw ka jinglynngoh ba haba la thied da ka ophis ka KHADC hynrei ym don records.
Haba jubab ïa kitei, na ka liang u CEM u la ong ba ka EC kam tip ba ka KHADC ka don artylli ki jaka ha Mawkyrwat, kawei kaba dang shudep plie ïa ka ophis bad kata kawei kaba la thied naduh u snem 2014.

“Hadien ba la ïoh jingtip ba don ka jaka ha Mawkyrwat ba la thied naduh u snem 2014 nga la wad ïa ki file hapoh ophis hynrei ymdon, kumta kane ka long kaba shyrkhei bad lada dei ban phah tohkit ruh ngi hap leh bad ka ophis kan hap leh ïa kaba donkam bad lada lah dep siew ïa katei ka jaka barim ngin hap shimkam, namar ngi la hap thied da kaba thymmai bad la dep plie ruh ïa ka ophis hynrei mynta ka KHADC ka la don 2 tylli ki jaka ha Mawkyrwat,” ong u CEM.
U la ong ba ka EC kan shimkhia bha ïa kane ka kam bad ka copy ba la ïoh ka pynsakhi ba la soi da u CEM barim u Bah Ardent Miller Basaïawmoit, u Secretary barim u Bah W. Syiemlieh, Bah R S Wanniang Joint Secretary bad ki nongïalam shnong.