JAC ki Rangbah Shnong ka thain Umsning, ba sniew surok Nongthymmai- Umtrew

Nongpoh, 20 Jylliew:
Haba shimkhia halor ka jingsniew palat jong ka surok kaba na Umsning Nongthymmai- Umtrew, mynta ka sngi ki riew rangbah ha ka thain Umsning, ki la thaw ia kawei ka synjuk kaba la tip kum ka Joint Action Committee of Headman Umsning Area bad ka jingthmu jong kane ka komiti ka long ban peit ia ka jinglong jingman jong ka surok na Nongthymmai- Umtrew.
Ka daw hi kaba la pynlong ia kine ki riew rangbah na ka thain Umsning ba kin thaw ia kane ka komiti, ka la jia ruh hadien ba ki la iohi ia ka jingshah iehnoh beit jong ka surok na Nongthymmai- Umtrew, ha kaba kat haduh jong kine ki sngi ym shem la maramot satia la ka long na ka PWD ne na ka NHAI ruh kumjuh bad kaba la wanrah jingeh shikatdei eh ia ki paidbah nongleit nongwan ym tang na ki thain Umsning, hynrei wat ia kiba nabar ruh kumjuh.
Haba iadei bad kane jingbym maramot ia katei ka surok, kane ka komiti ka la rai ruh ban leit iakynduh ia u DC ka Ri Bhoi, na ka bynta ban kyntu ia u ba un shimkhia halor katei ka surok, khang ba kan ym wanrah jingeh ia ki paidbah nongleit nongwan.
Ki nongkitkam jong kane ka komiti kiba la shah jied ha kane ka sngi ki kynthup ia u Bah Eddie G. Kharbani kum u Chairman, u Bah D. Ryntathiang Chairman ka Umsning Town Durbar kum u Adviser, u Bah B. Kharshiing kum u Secretary, u Bah R. Marwein kum u nongkren lem bad ki dkhot kiba dei ruh ki rangbah shnong ha katei ka thain.