“Israel: Ka mynsiem iohthiah lyngngai”

AIS Suja

U Blei u la ai ha ki Israel ka jingiohthiah lyngngai ong u Apostol Paul “Ia ki khmat ki bym shym la iohi, bad ki shkor ia ka ban ym iohsngew, haduh kane ka sngi” NongRom 11:8.

Ka mut kaei kata? Ka long ia ka jingpynim kein, ia kaba ki Israel ki iawad khnang hynrei pateng kim shym la shem. NongRom 11:7. Ki wad te ki wad ia ka jingpynim hynrei kim shem ia ka namar la tap matlah ia ki khmat jong ki ban ym iohi bad ia ki shkor ban ym iohsngew haduh mynta.

Ngi kynmaw ia kato ka por b u Jisu u la rung ha Jerusalem u da shong halor u khun Kadda ki pyrta ki ong – Long ba ka kyrkhu ia u Syiem uba wan ha ka kyrteng u Trai! Ka jingsuk ha bneng, ka burom ha kiba jrong tam eh, kat haduh ba ki Pharisi ki la ong ia uta u paidbah bad ia u Jisu – Ko Nonghikai to sneng ia kito ki synran jong me bad u Jisu u la jubab – Lada kine kin sngap jar, ki maw kin sa kyang buk” Loukas 19:32-40.

Dei ha kane kein ka por ba u Jisu u la iam na ka bynta ka Jerusalem, u da ong – “Ah lada pha la tip lypa, ma pha ruh shisha ha kane ka sngi ia kiei kiei kiba dei ia ka jingsuk jong pha! hynrei mynta la buhrieh ia ki na ki khmat jong pha!” Loukas 11:41-42.

Ki Israel kim ithuh ba u Jisu u dei uta u Messiah jong ki ha ka por ba u rung ha Jerusalem. Ka jingpyrta ka long kaba lehnohei “Long ba la kyrkhu ia u Syiem uba wan ha ka kyrteng u Trai” Ah lada ki Israel kin tip ha kato ka sngi ia kiei kiei kiba dei ka jingsuk jong ka Ri, hynrei la tap matlah ia ki khmat ba kin ym iohi ia ka burom u Blei u Khun u Blei. Kim shym la iohsngew ne pei phang ei ei ruh em ia kaei kaba u Jisu u la kren ha kato ka sngi ha Jerusalem. Kane ka dei ka jingiohthiah lyngngai ba kynja mynsiem jong ki Israel.

Ki jingpyrta jingai jingiaroh ha Jerusalem ki long lehnohei namar kim tip ba u dei uta u Syiem ki Jiw hynrei shu ia pyrta matlah da kaba ong “U Syiem haba ha ka dohnud jong ki pat ym don ei ei ruh. Dei ka daw ba la pyllong ia u Jisu ba un iam bad u ong artad – Ah lada pha (Jerusalem) la lah tip lypa ma pha ruh shisha, ha kane ka sngi ……. Pham shym ithuh ia ka aiom ka jingwan jngoh ia pha” Loukas 19:44.
Ki Israel kim ithuh kim tip ia ka aiom kaba u Blei u la wan jngoh ia ki, hynrei ki shu iaid hapoh ka jingdum ba kynja mynsiem tang ha ki jinghikai niam kiba patang la pateng. Ka jingrung jong u Jisu ha Jerusalem ka dei ka aiom ba u Blei u wan jngoh ia ki Israel kein. Dei ka jingbymithuh ia u Jisu kum u Syiem jong ki (Jiw), ka la pyllong ia ki kat haduh ban pyniap ia ki Nongiathuhlypa (Prophets) jong u Blei ha Jerusalem.
Na kane ka daw u Jisu u ong. Ah! Jerusalem, Jerusalem! Pha kaba pyniap noh ia ki Nongiathuhlypa bad kaba lynthem maw ia kita ia kiba la phah ha pha! katno sien nga la kwah ban kdup ia ki khun jong pha kumba ka syiar ka kdup ia ki khun jong ka hapoh ki thapniang jong ka, Pha te pham mon. Ha khmih ia ka iing (ka Ri) jong pha la iehnoh iing jah. Naba nga ong ha pha, ‘Phan ym iohi shuh ia nga naduh mynta, tat ynda phan ong – Long ba la kyrkhu ia uta uba wan ha ka kyrteng u Trai” Mathaios 23:37-39.
Ka jingwan jong u Jisu ha Jerusalem ka long shisha kaba sngew synei namar ki Israel kim pdiang ia u kum u Syiem jong ki. Kumta ki Israel ki la duh noh ia ka lad ba khadduh kaba u Blei u la tyrwa ha ki Israel ban long ka lad jingpyniasuk hapdeng jong ki kum ka jaid bynriew. Ha ka jingshisha ka la dei ia ki Israel ban long ka sngi kaba khraw tam jong ki Israel ha Jerusalem hynrei na ki daw jingiohthiah lyngngai ba kynja mynsiem bad jingmatlah ba kynja mynsiem, ki Israel ki la duh noh ia kane ka lad haduh tad ynda ki Israel kin ong – Long ba la kyrkhu ia uta uba wan ha ka kyrteng u Trai ha ka ban sa wan, kata ka long ha ka por ka jynjar bah bakhraw haba kin khot kyrpad ia u Trai.
Kumta ki Israel ki la duh noh ia ka lad ka kabu kaba nyngkong bad ki la mad ia ki jynjar bah kumba 2000 snem tad haduh u 1948. Hangne ruh kin ym pat ioh ia ka jingsuk tad kynda kin tip bad ithuh ba u Jisu u dei u Messiah jong ki bad kata ka por kan jia ynda ki khot kyrpad ia u Trai, bad u Trai un pyllait ia ki, ong ka ktien u Blei – “Kin khmih ha nga ia uba ki la sum, kin iam briew ia u Jisu ……. Ha kata ka sngi kan long kaba iam briew kaba khraw ha Jerusalem” Sekharaiah 12:10-11.
“Dei tad haduh ka sngi, ba u Blei un theh buk halor ka iing u David bad halor ki nong Jerusalem ia ka MYNSIEM KA JINGAIEI BAD JINGKYRPAD” Sekharaiah 12:10. Ka mynsiem jingaiei ba u Blei un pynpeit noh ia ki khmat jong ki kiba kim shym la iohi baroh shi katto, bad ki shkor ba kin sngew ba u Jisu u dei uta u Messiah ia uba ki la kyntait bad kin pdiang ia u ha kata ka sngi kein ha Jerusalem.
Kane baroh ka long halor jong ki Israel (Jiw). Kumjuh ruh ia ki Jentil kin ioh tip ba ka ia jingaiei ka la jan kut halor ki Jentil baroh, namar kan sdang noh ha ki Jiw da kata ka Mynsiem jing AIEI kaba na u Blei.
Kata ka por ka long hajan bad mynta kein. Amen.