Iohkem ki pulit, ia ki briew kiba donkti ha ka khaii ksiar beain

Nongpoh:Mynhynnin ka sngi ha ka por 10 baje ei ei mynstep, ki pulit ka Byrnihat Police Outpost, ki la ioh ban kem ia arngut ki briew kiba la tip kyrteng kum u Abdullah Hussain bad u Sanborlang Khaiong, kata hadien ba ki la shah kynnoh ba ki la donkti ha ki kam ban khaii beain ia ka Ksiar.

Ka tyllong khubor kaba la iohlum, la ong ba ka jingiohkem ki pulit ia kitei ki briew briew, ka dei hadien ba ki la pynap shrip ha Byrnihat hadien ba ki la ioh jingtip ba ka don ki briew kiba thmu ban shalan beain ia ka ksiar lyngba ka surok bah NH-6 bad kaba thmu ban pynpoi sha Assam.

Ia kitei ki arngut ki briew, la ioh ba kem na kawei ka kawei ka kali Scopio kaba don ia u number AS-01-EJ-6407, ha kaba ki pulit ynda ki la talasi na katei ka kali, ki la lap ia 20 tylli ki song biskit kaba la thep ksiar, ha kaba la ong ba la thep 10 tola ka ksiar ha kawei ka song biskit bad kaba la ong ba katei ka Ksiar ka shongdor kumba T. 65 hajar shi tola.