Ioh Zero ka tnad Custom na ka jingiohkem masi tuh sha Bangladesh

Shillong: U Asstt. Commissioner ka Shillong Custom Division, ha ka jingia kren bad u Rupang, u la iathuh ba namar ia kito ki masi ba la iohkem da ki BSF na ki khappud la aiti noh sha ka Gaushala,na ka liang ka Ophis Custom ka la long kum ban ong noh Zero namar kam don shuh kano kano ka jing iohlum halor kane ka kam.
Ka Supreme Court ba donburom jong ka ri India ka la hukum da ka ain ba la tip ka “Prevention of Cruelty to Animals ( Care and Maintenance of case Property Animals) Rules,2017 ka la khang ban die lilam noh iaki masi ba la ioh kurup da ki BSF na ki briew ba thmu ban shalan tuh sha Bangladesh naduh u bnai Naiwieng jong u snem 2018, pynban ia ki masi ba la iohkem da ki BSF yn aiti noh sha ka Gaushala ba kan peit ia kine ki masi.
Haba jubab ia ka jingkylli, u la ong ba ka daw ba la pynlong ban ym shah shuh ban die lilam ia kine ki masi ba la iohkem ka dei namar lada yn die lilam, kito ki briew ba shah knieh kin wan ban thied bad ka tnad Custom ka la ai ryngkat ka muhor halor ka jingthied jongki ka ban pynlong pynban kum ka jing ailad ba kin ioh die da kaba suk iaki.