Shillong:Saw ngut ki MLA, kiba leit pyniasoh ialade sha ka seng BJP, ki ioh tiket lut mynta ka sngi bad kitei ki long U Ma Robinus Syngkon na Mookaiaw, U Ma Justine Dkhar na Khliehriat, U Bah AL Hek na Pynthorumkhrah bad U Bah Sanbor Shullai na South Shillong.
Ym tang katta, ka tiket ka leit ruh sha U Bah Badhok Nongmalieh, uba la shah pynduh tiket ha ka seng Congress, ha kaba un iakhun na Jirang Constituency. Katei ka dei ka thup, kaba la pynmih mynta ka sngi, da ka seng BJP, kaba kynthup ia ki 57ngut ki kandidet.
Ka kong Violet Lyngdoh MDC, kaba dei ka para jong U Bah Shibun Lyngdoh, President ka seng BJP kam shym la ioh tiket satia bad la sngewthuh ba ka kong Violet, kan iakhun noh mynta na ka seng NPP na katei hi kajuh ka Constituency.
Ka jingioh tiket ki 4ngut ki MLA, ka la pyni ba ki jingkren jong u Ma Shibun, ha ki khyndiat sngi ba ladep, kam don jingmut eiei, ha kaba ula ju ong, ba ka seng BJP, kam shym la tyrwa tiket satia ia ki MLA kiba leit pyniasoh sha katei ka seng.
